Trent Alexander-Arnold, leikmaður Liverpool, segist ekki ætla að ræða samningamálin í fjölmiðlum.
Englendingurinn verður samningslaus eftir tímabilið en hann hefur verið orðaður við spænska stórliðið Real Madrid síðustu mánuði.
Samkvæmt enskum miðlum hefur Liverpool verið í viðræðum við leikmanninn en hann er sagður hafa hafnað nokkrum tilboðum frá félaginu.
Sky Sports spurði Trent út í stöðuna sem vildi lítið tjá sig um viðræðurnar.
„Ég hef verið hjá félaginu í 20 ár. Ég hef framlengt fjórum eða fimm sinnum við félagið og þær viðræður fóru aldrei í opinbera umræðu. Það sama á við um þessar viðræður,“ sagði Trent.
Varnarmaðurinn segir markmiðið að vinna fullt af titlum á þessu tímabili.
„Að vinna marga titla. Það er stigið sem við erum á akkúrat núna og sýnt að við erum færir um að gera, að vinna bestu lið heims,“ sagði Trent.
Athugasemdir
