1. Origo völlurinn - Valur

- Í raun sjálfvalið. Góð aðkoma, Fjósið er frábært, stúkan er flott og svæðið “pro”.

- Flott stúka nálægt vellinum með bekkina nær stúkunni sem er skemmtilegt. Fjósið algjör bylting í umgjörð Pepsi Max.

- Stúkan snýr í suður svo að maður geti notið sólarinnar án þess að hafa hana í augunum og maður getur yfirleitt valið sér sæti án þess að mæta of snemma.

- Eftir að Fjósið var tekið í notkun þá er kominn einhver andi yfir svæðið á leikdag sem maður finnur hvergi annarsstaðar.

2. Heimavöllur hamingjunnar - Víkingur

- Í Víkinni er yfirleitt veðurblíða og frábærar aðstæður fyrir bæði áhorfendur og leikmenn.

-Sólin skín í stúkuna og frábærir borgarar á grillinu.

- Besta veðrið, góð stúka nálægt vellinum og mjöður fyrir alla af dælu.

- Það skapast alltaf þétt stemning í Fossvoginum. Stúkan og allt svæðið myndar hina fullkomnu Pepsi Max-stemningu.

3. Kaplakriki - FH

- Stuttar raðir í veitingar í hálfleik og mikið rými til að spjalla við menn og málefni fyrir leik og í hálfleik í skjóli. Fjör í vallarþulinum og tónlistin skemmtileg.

- Umgjörðin skemmtileg í Krikanum. Matartorgið frábært í góðu veðri.

- Kaplakriki kemst næst Hlíðarenda með pallinum. Það í raun þarf ekki mikið til að Hafnfirðingar eigi bestu umgjörðina.

4. Kópavogsvöllur - Breiðablik

- Don Simon gerði vel hjá Blikum að koma í kring betri umgjörð, bjórtjald, battavellir fyrir börnin, góðir borgarar og æðisleg kampavínsstúka.

- Besta stúkan upp á hæð, eilítið langt frá leikvellinum þó. Bestu borgararnir í deildinni án vafa, fullt af bílastæðum skammt undan.

- Þegar stúkan er troðin er bara opnað hinumegin og þar er stórkostleg aðstaða fyrir helgarpabba.

5. Meistaravellir - KR

- Þegar vel gengur er sungið og trallað. Skemmtileg umgjörð og upplifun góð.

- Frostaskjól er í niðurníðslu og er að drabbast niður. Klósettskúrinn setur liðið í botnsætið sem og heróínleiksvæðið fyrir börn.

6. Würth völlurinn - Fylkir

- Hefur tekið stakkaskiptum með nýju stúkunni. Mun skemmtilegra að mæta í lautina í dag en áður.

- Skemmtileg stemning í því að labba inn í gegnum bakhlið stúkunnar. Þurfa bara að fara úr dósabjór í krana!

7. Norðurálsvöllurinn - ÍA

- Kostir Norðurálsvallarins er að hann er svolítið gamaldags og minnir á þá tíma sem Skaginn virkilega gat eitthvað, þar er bæði boðið upp á stúku og brekku.

- Stúkan leiðinleg og síðast þegar ég fór var ekki einu sinni hægt að fá veitingar þeim megin. Langt að fara allt, til dæmis á salerni og svo í veitingarnar.

8. Samsung völlurinn - Stjarnan

- Dúllubar hefur gert mikið fyrir Garðabæinn, frábær viðbót. Vel skipulögð umgjörð, sem er mjög mikilvægt.

- Þó að úti sé sól og 25°c tekst samt að vera við frostmark í stúkunni og ekki eru hræðilega óþægilegu sætin að hjálpa til. Ég ætla svo varla að minnast á súlurnar sem skyggja á völlinn.

- Fá plús fyrir Dúllubar og flott grill en stúkan er bara of KÖLD!

9. Greifavöllurinn - KA

- Vonandi mun félagið fá þann skilning sem það á skilið frá bænum.

- Völlurinn talsvert langt frá félagssvæði KA og áhorfendur dreifast fullmikið.

- Barn síns tíma og furðulegasta staðsetning á stúku í Evrópu.

10. Vivaldivöllurinn - Grótta

- Aldrei farið út á nes og fundið fyrir logni. Stúkan ca kílómeter frá vellinum.

- Löng röð í salernisaðstöðu, pínulítil sjoppa og mjög langt labb af bílastæðunum.

- Þaklaus stúka á svæði þar sem í 90% tilvika er vindur, auk þess sem aðalvöllurinn er mjög illa afmarkaður með alla þessa æfingavelli á bakvið.

11. Extra völlurinn - Fjölnir

- Það er margt óheillandi. Erfitt að fá bílastæði, alltaf óljóst hvar þú átt að labba inn og þegar það rignir er mínus að hafa ekki yfirbyggða stúku.

- Að fá stæði? Hræðilegt. Göngulengdin frá miðasölu að stúku? Hræðileg. Stúkan? Varla hægt að kalla hana það. Stuðningur við heimalið? Heyrist varla.

- Eini kosturinn sennilega king Kárapallur og hann er splunkunýr.

- Fyrstu deildar völlur í efstu deild.

12. Kórinn - HK

- Slagorð Kórsins ætti að vera: "Kórinn, þar sem allir leikir eru eins og æfingaleikir".

- Fer ekki inn til að horfa á fótbolta á sumrin, alveg eins og ég fer ekki í golfhermi þegar það eru 20 gráður og sól úti.

- Tilfinningin að fara á leik í Íslandsmótinu innanhúss er bara ekki góð. Líður alltaf eins og ég sé kominn á eitthvað janúarmót þegar ég mæti á leik í Kórnum.

- Bergmálsbolti í efstu deild er bara óboðlegt. Sama hvað HK-ingar munu reyna verður þetta versta upplifunin þar til þeir fá útivöll. Ömurlegt.