Alþjóðaknattspyrnusambandið FIFA hefur staðfest að HM félagsliða muni fara fram þetta tímabilið þrátt fyrir hætturnar sem stafa af Covid-19 faraldrinum og takmarkanir sem hafa verið settar á víða um heim.
HM er vanalega haldið í desember en það átti að fara fram með breyttu sniði í Kína næsta sumar. Keppnina átti að stækka í 24 lið og átti hún að fara fram í júní og júlí en hætt var við þau áform vegna áhrifa kórónuveirunnar á undankeppnir fyrir EM20 og Suður-Ameríkubikarinn.
Keppnin verður því haldin 1. - 11. febrúar 2021 í Katar. FC Bayern mun spila fyrir hönd Evrópu en Liverpool vann í fyrra eftir sigur gegn Flamengo í uppbótartíma.
Ekkert annað lið hefur tryggt sér þátttökurétt á HM að undanskildu Al-Duhail, sem vann efstu deild í Katar. Bestu lið hverrar heimsálfu munu einnig taka þátt í mótinu en ekkert lið utan Evrópu hefur unnið keppnina síðan Corinthians lagði Chelsea að velli 2012.
Þá hefur FIFA ákveðið að færa HM kvenna U17 og U20 til 2022.
Athugasemdir
