„Við erum léttir. Við þurftum lífsnauðsynlega á þessum sigri að halda bæði útaf stigum og líka útaf frammistöðunni. Við þurftum ýmislegt að sanna fyrir okkur sjálfum eftir afar dapran leik á móti Blikum síðast. Þetta var miklu betra í dag. Þetta var lífsnauðsynlegt," sagði Atli Sveinn Þórarinsson, annar þjálfara Fylkis, eftir 3-1 heimasigur gegn ÍA í kvöld.
Lestu um leikinn: Fylkir 3 - 1 ÍA
Fylkir spila 2 leiki á stuttu millibili í næstu viku en þeir eiga bikarleik gegn 4. deildar liði Úlfanna og síðan stuttu eftir eiga þeir Val á Hlíðarenda. Atli var spurður hvort hann muni stilla upp yngra liði fyrir bikarleikinn.
„Nei við förum af fullum krafti í þann leik. Bikarkeppnin er bikarkeppnin þannig að við stillum bara upp mjög sterku liði á móti Úlfunum."
Félagsskiptaglugginn opnar fyrir lið þann 29. júní og hafa Fylkismenn verið að skoða sig um og eru að leita að liðsstyrk.
„Já, við erum að skoða það af því að við höfum lent í fleiri meiðslum en við kannski bjuggumst við með Djair, Nikulás Val og Arnór Borg meðal annars. Svo missum við líka Birki út í skóla aftur í haust þannig að við erum svona að leita að því að styrkja okkur aðeins."
Viðtalið í heild sinni má finna í sjónvarpinu hér að ofan
Athugasemdir
