Guðmundur Magnússon leikmaður Fram var nokkuð sáttur með úrslit kvöldsins eftir að liðið hans gerði 1-1 jafntefli við ÍA í Úlfarsárdalnum.
Lestu um leikinn: Fram 1 - 1 ÍA
„Bara hörkuleikur, Skagamenn eru með hörku lið og við erum með hörku lið. Þannig að þetta var bara frábær skemmtun."
Guðmundur skoraði mark Framara í dag og er þá kominn með 3 mörk í deildinni.
„Ég er bara að komast í betra og betra stand, meira 'game fit', svo er það bara að halda áfram. Ég hefði getað skorað svona fimm mörk í bikar leiknum á föstudaginn, og þú veist þetta kemur bara."
Guðmundur átti tvö mjög góð færi áður en hann skoraði markið sitt. Hann segir að það hafi verið gott að sjá boltan í netinu eftir að hann klikkaði á þeim.
„Fyrra skotið mitt var svona, ég hefði getað gert betur. En svo fékk ég færi í byrjun seinni hálfleiks. Þar gerði markmaðurinn bara vel, lokaði vel á mig. Það var sætt að sjá hann í netinu síðan."
Framarar sitja í 4. sæti deildarinnar eftir 7 leiki og það er töluvert ofar en þeim var spáð.
„Ég held að við höfum bara smollið rétt fyrir mót. Við áttum tvo góða æfingaleiki rétt fyrir mót, og þá fengu menn svona trúnna, við fundum okkar kerfi, og mönnum líður vel."
Viðtalið má sjá í heild sinni í spilaranum hér fyrir ofan.
