Zoran Daníel Ljubicic.
,,Það er aldrei gott að tapa en við mættum góðu liði FH í dag og vissum það fyrirfram að þetta er besta lið landsins með marga góða leikmenn," sagði Zoran Daníel Ljubicic þjálfari Keflavíkur eftir 2 - 4 tap heima gegn FH í Pepsi-deildinni í dag.
Lestu um leikinn: Keflavík 2 - 4 FH
,,Við lögðum bara áherslu á að sitja pínulítið aftar og vera vel skipulagðir og leyfa þeim að vera með boltann, og beita skyndisóknum."
,,Staðan var 0 - 0 eftir fyrri hálfleikinn og við fengum fín færi til að komast yfir en því miður kláruðum við það ekki og svo gleymum við okkur einu sinni í vörninni og þeir refsa okkur. Þeir eru mjög góðir að refsa liðum þegar þeir gera mistök."
,,Í seinni hálfleik lögðum við áherslu á að pressa þá hátt uppi og reyna að jafna en það voru bara fínir kaflar í leiknum. Fyrstu 15-20 mínúturnar reyndum við og vorum að skapa hálffæri en svo fáum við tvö mjög ódýr mörk á okkur sem slá okkur útaf laginu. En við komum aftur pínulítið til baka en það er mjög jákvætt að skora tvö mörk á móti FH."
,,Í síðustu tveimur leikjum lendum við í vandræðum með sóknarleikinn en sóknarleikurinn var ágætur í dag, við skorum tvö mörk og fáum færi en varnarleikurinn var vandamál í dag hjá okkur. Við gerum bara óþarfa mistök sem lið eins og FH refsa einn tveir og þrír."
Nánar er rætt við Zoran í sjónvarpinu hér að ofan en þar er meðal annars rætt við hann um framherjann Guðmund Steinarsson sem hafði ekkert skorað í sumar þegar hann skoraði úr vítaspyrnu í dag.
,,Maður vill fá miklu meira frá Guðmundi Steinarssyni sóknarlega. Við vitum hvernig leikmaður hann er. Hann er alltaf mikilvægur okkur og gerir gott á vellinum, heldur boltanum vel og opnar svæði fyrir hina leikmennina sem er líka mjög jákvætt."
Athugasemdir
