Tyrkneskir fjölmiðlar fjalla um að tyrkneska liðið hafi fengið stranga og tímafreka öryggisleit og vegabréfaskoðun.

„Það sem þeir hafa gert er vanvirðing og dónaskapur. Við höfum þurft að bíða í þrjá tíma. Það hefur verið leitað í öllum farangri okkar aftur og aftur. Við flugum í sex og hálfan tíma og höfum svo þurft að bíða í þrjá tíma," er haft eftir Burak Yilmaz, leikmanni Tyrklands.

Aron Einar Gunnarsson, landsliðsfyrirliði, sagði að íslenska liðið hefði lent í svipuðu þegar það flaug frá flugvellinum í Konya í Tyrklandi á sínum tíma.

Reiði var í Tyrklandi vegna þess, en einnig var mikil reiði vegna þess að einstaklingur beindi þvottabursta að fyrirliða Tyrklands þegar hann var að ræða við fjölmiðlamenn á Leifsstöð.

Isavia, sem sér um rekstur Keflavíkurflugvallar, sendi frá sér yfirlýsingu í dag. Yfirlýsingin er birt í heild sinni á Vísi.

Þar segir að ferlið í heild sinni hafi tekið um 80 mínútur, ekki 180 mínútur eins og tyrknesku landsliðsmennirnir sögðu. Einnig segir að öryggisleitin hafi tekið lengri tíma en vanalega því leita þurfti að raftækjum og vökva í óvanalega mörgum töskum.

„Öryggi farþega sem fara um Keflavíkurflugvöll er eitt af grunngildum Isavia og öryggisreglur þær sem fylgt er á flugvellinum eru settar á grundvelli alþjóðlegra skuldbindinga. Af þeim sökum eru Isavia ekki í neinni stöðu til að gefa undantekningar frá þessum mikilvægu reglum," segir í yfirlýsingunni.

Sjá einnig:
Tyrknesk stjórnvöld senda formlega kvörtun
Segir að atvikið með uppþvottaburstann hafi verið rasískt
Burstamaðurinn fundinn - Ekki frá Íslandi