Vestramenn sagðir vonast eftir niðurstöðu í dag - Pirraðir á hægagangi KSÍ

Þetta var til umræðu í hlaðvarpsþættinum Gula Spjaldið í gær og hafði Albert Brynjar Ingason upplýsingar um málið.

„Ég veit að Vestri er að vonast eftir svörum, niðurstöðu í þetta mál á morgun (í dag). Það sem ég heyri er að þetta séu 32 veðmál og samanlagt upp á 90 þúsund krónur," segir Albert en ekki er tekið fram hvort að öll veðmálin tengist leikjum í Bestu deildinni.

„Það sem pirrar Vestramenn er að KSÍ er búið að vita af þessu síðan í nóvember. Af hverju að bíða svona?" veltir Albert fyrir sér.

Besta deildin hefst eftir rúmar tvær vikur og verður fróðlegt að sjá hversu þung refsing Elmars Atla verður. Vestri þarf mögulega að finna nýjan leikmann í stað Elmars ef hann missir af stórum hluta mótsins, eða jafnvel öllu mótinu.