Sterkasta lið 19. umferðar - Blikar komnir við hlið Víkings á toppnum

Við gerum upp 19. umferð Bestu deildarinnar og teljum leik Vals og Breiðabliks síðasta fimmtudag með í því uppgjöri (þó hann skráist í raun í 16. umferð deildarinnar).

Spennan eykst og Breiðablik er komið upp að hlið Víkings á toppi deildarinnar með því að tengja saman 2-0 sigur gegn Val á fimmtudag og svo 3-1 sigur gegn Fram í gær.

Anton Ari Einarsson var maður leiksins í sigrinum gegn Val en hann lokaði á sitt fyrrum félag. Damir Muminovic var hrikalega öflugur í báðum leikjum, fagnaði nýja samningnum með því að koma að marki gegn Val og skora svo í gær.

Höskuldur Gunnlaugsson fyrirliði Blika er í úrvalsliðinu í fimmta sinn í sumar, Davíð Ingvarsson hefur komið hrikalega öflugur inn og þá fær Ísak Snær Þorvaldsson að sjálfsögðu sæti í liðinu. Hann er að finna sitt fyrra form og skoraði í báðum leikjunum.