„Mér líður mjög vel. Það er framar vonum að vinna svona stórt en auðvitað ætluðum við okkur sigur og ætluðum að spila vel,“ sagði kampakátur Þorsteinn Halldórsson, þjálfari Breiðabliks, eftir 4-0 stórsigur á Val.
Lestu um leikinn: Breiðablik 4 - 0 Valur
„Við byrjuðum leikinn af krafti. Fengum 2-3 dauðafæri strax í byrjun en svo jafnaðist leikurinn aðeins seinni part fyrri hálfleiks. Svo komum við bara inn í seinni hálfleik af krafti og settum tvö. Svo lágu þær aðeins á okkur en þegar þú ert að spila á móti góðu liði eins og Val þá þarftu að verjast og mér fannst við heilt yfir gera það vel. Þær sköpuðu sér ekkert opið færi en áttu nokkur skot í kringum vítateiginn en Sonný var virkilega flott í markinu í dag,“ sagði Steini um leikinn.
Blikar hafa verið funheitar í upphafi móts. Eru með fullt hús stiga, 19 mörk skoruð og hafa ekki enn fengið á sig mark. Hver er lykillinn að þessari sterku byrjun?
„Langstærsti hlutinn er náttúrulega bara frábærir leikmenn. Frábær hópur og það er alltaf grundvallaratriði til að árangur náist. Að leikmenn séu samstíga, vita hvað þeir vilja og hvert þeir eru að stefna.“
Nánar er rætt við Steina í spilaranum hér að ofan.
Athugasemdir