Liverpool átti draumabyrjun á tímabilinu og vann fimm leiki í röð, en sá draumur breyttist fljótlega í martröð.

Liðið hefur verið í frjálsu falli með tilkomu nýrra leikmanna og þeir ekki enn búnir að gerjast saman með þeim sem voru fyrir hjá félaginu.

Heimamenn litu ágætlega út í byrjun fyrri hálfleiks og fengu nokkra ágætis sénsa, en á 33. mínútu komust Forest-menn óvænt í forystu eftir hornspyrnu.

Boltinn datt fyrir Murillo í teignum sem skaut föstu skoti framhjá Alisson. Markið þótti umdeilt en Dan Ndoye stóð í rangstöðu og truflaði sjónlínu Alisson, en markið dæmt gott og gilt.

Tveimur mínútum síðar setti Igor Jesus boltann í netið en í þetta sinn var það dæmt af þar sem hann átti að hafa handleikið boltann í aðdragandanum, en það virtist líka fremur vafasamur dómur.

Staðan í hálfleik 1-0 fyrir Forest en strax í byrjun síðari bætti Nicola Savona við öðru marki. Alexis Mac Allister tapaði boltanum klaufalega hægra megin í teignum, boltinn settur út á Savona sem skaut boltanum í markið.

Morgan Gibbs-White rak síðasta naglann í kistu Liverpool á 78. mínútu. Alisson varði fyrra skotið frá Omari Hutchinson, boltinn út á Gibbs-White sem setti hann örugglega í hægra hornið.

Skelfileg frammistaða frá Liverpool og sungu stuðningsmenn Forest hátt og snjallt: „Hann verður rekinn í fyrramálið“ til Arne Slot.

Það er spurning hvað hann fær marga leiki til að snúa gengi Liverpool við, en útlitið er alla vega ekki gott. Liverpool er komið niður í 11. sæti með 18 stig, átta stigum frá toppnum en Forest í 16. sæti með 12 stig.

Daniel Munoz og Yeremy Pino tryggðu Crystal Palace 2-0 sigur á Úlfunum á Molineux.

Bikarmeistararnir líta mjög vel út og sitja í 4. sæti með 20 stig en Úlfarnir áfram á botninum með 2 stig og stefnir allt í að þeir fari niður.

Brighton vann 2-1 sigur á Brentford á AMEX-leikvanginum. Igor Thiago skoraði úr vítaspyrnu á 29. mínútu en í síðari hálfleik náðu Brighton-menn að snúa taflinu við.

Danny Welbeck skoraði á 71. mínútu og jafnaði leikinn áður en varamaðurinn Jack Hinshelwood gerði sigurmarkið sex mínútum fyrir lok venjulegs leiktíma.

Á lokasekúndum uppbótartímans fengu Brentford-menn vítaspyrnu og aftur fór Thiago á punktinn en Bart Verbruggen reyndist hetja Brighton og varði vítið.

Brighton er í 5. sæti með 19 stig en Brentford í 12. sæti með 16 stig.

Raul Jimenez var hetja Fulham í 1-0 sigrinum á nýliðum Sunderland.

Hann gerði eina markið á 84. mínútu eftir stoðsendingu Samuel Chukwueze.

Fulham er í 14. sæti með 14 stig en Sunderland komið niður í 6. sæti með 19 stig.

Antoine Semenyo-lausir Bournemout-menn gerðu 2-2 jafntefli við West Ham á Vitality-leikvanginum.

Callum WIlson, sem dreymir um að fara með Englendingum á HM, kom Hömrunum yfir á 11. mínútu og bætti hann við öðru marki á 35. mínútu. Draumur Wilson lifir og West Ham í góðri stöðu.

Í síðari hálfleik komu Bournemouth-menn til baka. Marcus Tavernier minnkaði muninn úr vítaspyrnu og þá jafnaði Enes Unal metin á 81. mínútu til að bjarga stiginu.

Wolves 0 - 2 Crystal Palace
0-1 Daniel Munoz ('63 )
0-2 Yeremy Pino ('69 )

Fulham 1 - 0 Sunderland
1-0 Raul Jimenez ('84 )

Liverpool 0 - 3 Nott. Forest
0-1 Murillo ('33 )
0-2 Nicolo Savona ('46 )
0-3 Morgan Gibbs-White ('78 )

Brighton 2 - 1 Brentford
0-1 Igor Thiago ('29 , víti)
1-1 Danny Welbeck ('71 )
2-1 Jack Hinshelwood ('84 )

Bournemouth 2 - 2 West Ham
0-1 Callum Wilson ('11 )
0-2 Callum Wilson ('35 )
1-2 Marcus Tavernier ('69 , víti)
2-2 Enes Unal ('81 )