,,Ég get ímyndað mér að það hafi verið sérstaklega leiðinlegt að horfa á þetta sem áhorfandi," sagði Viðar Guðjónsson miðjumaður Fjölnis eftir markalaust jafntefli við ÍBV í Lengjubikarnum í dag en aðeins eitt færi var í öllum leiknum.
Fjölnir hafði spilað á fimmtudagskvöldið í 7-0 sigri á HK og ÍBV spilaði síðast í gærkvöld í leik sem lauk undir miðnætti.
,,Tempóið var gríðarlega lágt enda liðið þreytt og stutt síðan við spiluðum síðast. Ég get alveg sagt þér að það var ekkert sérstaklega gaman að spila þetta heldur, viljinn var til staðar og hugurinn en líkaminn fylgdi ekki með."
,,Menn eru bara þreyttir og ekki vanir að spila með svona stuttu millibili, sérstaklega á undirbúningstímabilinu, þá eru þetta oft svona leikir. Mikið af feilsendingum og mikið af því að menn ætla að reyna að rífa sig framhjá manni en gátu það hreinlega ekki af því að lappirnar þoldu það ekki."
,,En það eina jákvæða við þetta var að við töpuðum ekki miðað við hversu slakir við vorum en ætli Vestmannaeyingar segi ekki það sama."
Nánar er rætt við viðar í sjónvarpinu hér að ofan.
