Magnús Már Einarsson skrifar frá Englandi
Eyjólfur Sverrisson
,,Þeir spiluðu stórglæsilegan leik í dag og alveg með ólíkindum að sjá þorið í leikjunum. Það er mikill vilji, og þeir ætla sér langt. Maður sér það, og sérstaklega hvað þeir eru fljótir að breyta frá vörn í sókn, og sókn í vörn, það er algjörlega til fyrirmyndar," sagði Eyjólfur Sverrisson þjálfari U21 árs landsliðsins eftir 1-2 sigur á Englandi í vináttuleik ytra í kvöld.
,,Þó við lendum undir þá höldum við okkur við okkar kerfi og höldum áfram að spila fram á við og verjumst vel. Oft vantaði bara síðustu sendingu upp á að við værum sloppnir í gegn í skyndisóknunum okkar. Við fengum góð færi í þessum leik og ég myndi segja að þetta væri verðskuldaður sigur."
Eyjólfur gerði nokkrar breytingar frá leiknum gegn Úkraínu á fimmtudaginn og var án leikmanna sem spiluðu hvað mest með A-landsliðinu. Því er ljóst að hann hefur úr mörgum mönnum að spila sem gera honum erfitt fyrir að velja.
,,Heldur betur, það er verið að gera okkur heldur betur erfitt fyrir að velja liðið. Það hefur verið gott alla keppnina og fullt af góðum strákum eins og ég hef alltaf sagt. Þetta er vaxandi lið sem verður alltaf heilsteyptara og betra. Menn vita nákvæmlega hvað þeir eru að gera á vellinum og við erum að róa í sömu átt. Það virðist koma maður í manns stað."
Haraldur Björnsson var byrjunarliðsmarkvörður í báðum leikjunum og var sendur til móts við aðal landsliðið á laugardaginn þar sem hann var á bekknum gegn Kýpur. En verður hann aðalmarkvörður í sumar?
,,Halli er búinn að spila flesta leiki með okkur sem fyrsti markmaður. Hann hefur staðið sig gríðarlega vel. En við erum líka fegnir að hafa Arnar Darra sem kom inná núna og stóð sig virkilega og stóð sig virkilega vel og var mjög öruggur í sínum aðgerðum. Við eigum líka fleiri heima, góðir markmenn sem eru á uppleið og við munum fylgjast með. Við lokum ekki á eitt eða neitt, það eiga allir jafna möguleika, en Halli er búinn að gera sitt fyrir liðið."
Nánar er rætt við Eyjólf í sjónvarpinu hér að ofan.
