Ejub Purisevic.
,,Það er mjög gott að halda hreinu. Það var svolítið hátt tempó í fyrri hálfleik og við vorum svolítið heppnir í nokkrum tilvikum," sagði Ejub Purisevic þjálfari Víkings frá Ólafsvík við Fótbolta.net eftir 2-0 sigur liðsins á Fjölni í kvöld.
Ólafsvíkingar héldu einnig hreinu í 1-0 sigri á Leikni fyrr í vikunni og Ejub er ánægður með varnarleikinn.
,,Við erum byrjaðir að spila aðeins betri vörn. Síðustu tíu mínúturnar hættum við að pressa á miðjunni og frammi og þá fáum við á okkur færi þannig að ég tel að við getum bætt okkur alls staðar á vellinum með varnarleik."
Víkingur hafði mikla yfirburði í annarri deildinni í fyrra og Ejub telur að liðið geti staðið sig í fyrstu deildinni í sumar.
,,Ég held að við getum staðið okkur ágætlega. Við erum með ágætis lið en það eru jöfn og fín lið í fyrstu deildinni. Ég held að það verði spenna lengst af í mótinu."
Hér að ofan má sjá viðtalið í heild sinni.
