Ólafur Þórðarson, þjálfari Fylkis, segir að það hafi verið fullt af jákvæðum punktum í spilamennsku síns liðs þrátt fyrir tap gegn Val í úrslitaleik Lengjubikarsins í kvöld. Hann segir það svekkjandi að liðið hafi ekki náð að nýta yfirburði sína í fyrri hálfleik til að skora meira en eitt mark.
„Það er samt jákvætt að við vorum að spila mjög vel og skapa fullt af færum, við þurfum bara að nýta þau betur til að slútta svona leikjum. Liðið var að fúnkera vel og við vorum að gera fullt af flottum hlutum,“ segir Ólafur.
„Það fjaraði aðeins undan þessu hjá okkur. Mér fannst Valsmenn fá þessa vítaspyrnu sem þeir jafna úr frekar ódýrt. Þá missum við svoldið hausinn.“
Ólafur var heldur ekki sáttur við aðdragandann að þriðja marki Vals. Christian Mouritsen var búinn að fá aðhlynningu og Magnús Þórisson dómari hleypti honum inn í leikinn að nýju sem viðbót í miðri skyndisókn Hlíðarendaliðsins.
„Það er náttúrulega bara skandall hjá dómaranum,“ segir Ólafur um atvikið en nánar er rætt við hann í sjónvarpinu hér að ofan.
