KR-Valur í úrslitum Valitor-bikarsins í dag kl.16:00
„Þetta leggst svakalega vel í okkur. Okkur hlakkar svakalega mikið til. Við erum búin að bíða eftir þessu núna í nokkra daga, síðan eftir síðasta deildarleik og við getum ekki beðið,“ sagði Gunnar Borgþórsson í samtali við Fótbolta.net en við náðum tali af honum á blaðamannafundi sem haldinn var í tengslum við bikarúrslitaleikinn á fimmtudag.
„Það er svakalega góð stemning og við höfum æft vel. Við leikum okkur aðeins í dag og brjótum hlutina upp og svo höldum við áfram að undirbúa okkur á morgun.“
Gunnar segist ekki enn hafa gefið upp vonina um að landa báðum stóru titlunum og ætlar sér sigur á laugardag til að ná fyrsta bikar í hús.
„Við stefnum ennþá á að landa þeim báðum þó að það sé kannski svolítið fjarlægur draumur. Við hugsum um að vinna fyrsta titilinn. Það var alltaf fyrst í bókunum að taka þennan þar sem við getum klárað hann fyrst og við ætlum að gera það á laugardaginn.“
„Það eru allir heilir og loksins komnir til baka,“svaraði Gunnar aðspurður um stöðuna á leikmannahópi Vals og útilokar ekki að það verði einhverjar breytingar á Valsliðinu fyrir bikarúrslitaleikinn.
„Það gæti vel verið. Við erum með rétt rúmlega 20 manna hóp þar sem allir eru heilir núna í fyrsta skipti. Pála Marie er til dæmis að koma til baka. Það verður bara gaman að sjá hvernig leikmennirnir tækla það að berjast um sæti í liðinu.“
Andstæðingar Vals í dag eru KR-ingar og Gunnar segir Valsliðið verða að eiga toppleik til að ná sigri.
„Það leggst mjög vel í mig. KR er með sterkt lið. Við höfum spilað á móti þeim í deildinni og lentum í miklum vandræðum með þær í seinni hálfleik á heimavelli. Þær eru með mjög sterka sóknarmenn og svo eru þær búnar að fá nýja leikmenn inn sem breyta liðinu töluvert mikið. Við vitum að þetta verður þolinmæðisvinna og við verðum að leggja okkur allar fram og eiga okkar besta leik til þess að sigra.“
KR-liðið hefur tekið þónokkrum breytingum síðan liðin áttust við í deildinni en Gunnar hefur kynnt sér KR-liðið vel.
„Við eigum leikina alla á vídjóteipi og höfum verið að fara yfir þá. Á morgun klárum við undirbúning og sýnum stelpunum það sem við höfum verið að skoða.“
Gunnar verður með lið í bikarúrslitum í fyrsta skipti á eftir og hlakkar mikið til.
„Þetta er eitt af mínum stærstu verkefnum og ég hlakka svakalega mikið til. Ég hef aldrei tekið þátt í leik á nýja Laugardalsvellinum og ég get ekki beðið.“
„Taugarnar eru alveg í lagi. Ég er alveg sulturólegur yfir þessu eins og er.“
Hægt er að horfa á viðtalið við Gunnar í sjónvarpinu hér að ofan.
