„Mér líður mjög vel með sigurinn. Við vorum góðar í fyrri hálfleik og kláruðum þetta eiginlega þá og silgdum þessu svo heim í seinni hálfleik. Mér fannst við gera það mjög vel.“ sagði Pétur Pétursson, þjálfari Vals, eftir 2-0 sigur Vals gegn Víkingum í Víkinni í dag.
Lestu um leikinn: Víkingur R. 0 - 2 Valur
Valsliðið kom sér í góða stöðu í fyrri hálfleiknum og kláruðu leikinn í seinni hálfleiknum með góðum og öguðum varnarleik.
„Það má segja að við höfum klárað þetta fagmannlega í seinni hálfleiknum. Við gátum alveg haldið í boltann betur en við kláruðum þetta og silgdum þremur stigum heim.“
Það er erfitt að vinna Víkinga vill Pétur meina og þess vegna er hann sérstaklega ánægður með stigin þrjú í dag.
„Leikurinn spilaðist nokkurn veginn eins og við héldum að hann myndi gera fyrir leik. Víkingur er með gott lið og það er erfitt að vinna þær. Þetta er bara gott lið sem við spiluðum á móti og þess vegna er ég sáttur með þrjú stig.“
Pétur er sáttur með það að það sé að koma smá frí fyrir leikmennina og hann sjálfan.
„Ég er mjög sáttur með þetta. Núna er landsleikjafrí framundan og þá er hægt að slaka aðeins á sem er frábært. Það er fínt að hvíla sig aðeins. Það er líka fínt að hvíla sig á leikjunum, ég er orðinn svo gamall og ruglaður að ég verð að gera það.“
Pétur var ánægður með umgjörðina hjá Víkingum í kringum leikinn í dag en það voru toppaðstæður fyrir knattspyrnuiðkun á höfuðborgarsvæðinu í dag.
„Frábærlega gert hjá Víkingum með umgjörðina og annað. Mjög vel gert.“ sagði svo Pétur.
Viðtalið við Pétur má sjá í heild sinni í spilaranum hér að ofan.