Hallgrímur Jónasson þjálfari KA var að vonum gríðarlega ánægður með fyrsta sigur liðsins í deildinni í sumar þegar liðið lagði Fylki af velli á Akureyri í dag.
Lestu um leikinn: KA 4 - 2 Fylkir
„Þetta er æðislegt. Þetta var spennandi leikur. Við erum búnir að vinna tvo í röð og skorum fjögur mörk en það var kannski óþarfa stress á tímapunkti í seinni hálfleik," sagði Haddi.
KA var með góða forystu í hálfleik en Fylkismenn komu sterkir inn í síðari hálfleikinn.
„Við mætum ótrúlega flottir í leikinn. Spilum frábæran fyrri hálfleik og skorum þrjú mörk og eigum skot í slá. Síðan gerist það í seinni hálfleik að þeir gera þrjár skiptingar og skipta um kerfi. Þeir skora því miður snemma og það kemur smá hræðslutilfinning hjá okkur, kannski út af genginu undanfarið," sagði Haddi.
Viðar Örn Kjartansson lagði upp fjórða mark liðsins en hann hefur farið hægt af stað með KA.
„Það er æðislegt. Hann gerði mjög vel eftir að hafa komið inn á. Hann sér hlutina á háu leveli. Hann kemur inn á og leggur sig fram, ég er mjög ánægður með frammistöðuna hans í dag," sagði Haddi.
