KA tapaði gegn Val með einu marki gegn engu á Dalvíkurvelli í dag. Arnar Grétarsson þjálfari KA var að vonum svekktur eftir leikinn.
Lestu um leikinn: KA 0 - 1 Valur
KA menn byrjuðu af krafti en náðu ekki að nýta færin sín
.,Þetta er svekkjandi. Tvö góð lið að spila og við byrjum aðeins betur en Valur, en það sem skilur á milli í leikjum að nýta færin, við fengum svo sannarlega færin til að skora í þessum leik. Þeir fengu líka færi eftir föst leikatriði."
Valsmenn komu sterkari inn í síðari hálfleikinn að mati Arnars.
„Í seinni hálfleik þá fannst mér Valsmenn vera sterkari. Fá víti en Stubbur gerir vel þar. Þar er sofandaháttur, kemur upp úr innkasti þar sem við köstum á mann sem er sofandi og Arnór Smára fær boltann og sendir hann í gegn."
„Það sem er enn meira svekkjandi er hvernig markið kom. Að Patrick Pedersen hafi skorað á fjarstöng. Það var búið að ræða það vel fyrir leik að hann droppar alltaf á fjær að vera vakandi fyrir því."
KA klikkaði á tveimur vítaspyrnum í dag og hafa þeir því klúðrað fjórum vítaspyrnum í röð. Stubbur, markvörður liðsins hefur lýst yfir áhuga á að taka víti. Mun hann taka það næsta?
„Við þurfum að skoða það. Ég er ekki farinn að hugsa um það hver tekur víti. Auðvitað er gríðarlega svekkjandi að vera búnir að klúðra fjórum vítum það telur. Við hefðum geta farið með eitt mark yfir í hálfleik, þá hefðum við verið með svolítið breyttan leik."
Athugasemdir
