Stælar í Kórnum: Rúnar Kristins með 'fake handshake' og húfan slegin af Ómari

Það var hádramatík í Kórnum í kvöld þegar HK vann magnaðan 2-1 sigur gegn Fram. Flautumark í blálokin gerir það að verkum að HK er jafnt Vestra að stigum fyrir lokaumferðina en liðin bítast um að halda sæti sínu.

Það var mikill hiti milli manna í leikslok, Rúnar Kristinsson þjálfari Fram tók ekki í höndina á Ómari Inga Guðmundssyni þjálfara HK og stympingar voru á milli manna á leið til búningsklefa. Þorri Stefán Þorbjörnsson leikmaður Fram sló derhúfuna af Ómari Inga.

Ástæðan fyrir hitanum er sú að þegar HK-ingar vor að reyna að sækja sigurmarkið í lokin neitaði liðið að skila boltanum til baka á Framara sem höfðu sparkað honum út af til að hægt væri að hlúa að Guðmundi Magnússyni. Það sauð upp úr milli bekkjanna og orðaskipti voru.

Eins og sjá má á samfélagsmiðlinum X þá var verulegur pirringur manna á milli eftir leik.