„Mér líður ömurlega. Þetta var ekki nógu gott hjá okkur í dag en það er stutt á milli í þessu.“ sagði Aron Elís Þrándarsson, leikmaður Víkings, eftir 2-0 tap gegn KA í úrslitaleik Mjólkurbikars karla.
Lestu um leikinn: KA 2 - 0 Víkingur R.
Aron segir að þetta hafi hreinlega ekki verið dagurinn hjá Víkingum.
„Þetta var off dagur hjá okkur í dag og við nýttum ekki færin. Mér fannst við eiga að fá allavegana tvö víti. Það er erfitt að segja það núna. Mér fannst þeir fara í Valda einu sinni í teignum og svo fer boltinn í hendina á þeim einu sinni. Við vorum off í dag og þetta var ekki alveg nógu gott.“
Aron vildi meina að Víkingur átti að fá tvær vítaspyrnur í leiknum.
„Valdi er á undan í boltann og Ívar hreinsar í burtu. Hann hreinsar Valda í burtu en ekki boltann. Svo kassa ég hann niður og mér fannst hann slá boltann. En auðvitað er létt að segja það inn á vellinum en svo lítur þetta öðruvísi út í sjónvarpinu.“
Aron er ekki sáttur með mörkin sem Víkingur fékk á sig í dag.
„Það er pirrandi að fá mörk á sig úr föstu leikatriði. Þeir sleppa einu sinni í gegn í fyrri hálfleik annar fannst mér við vera með stjórn á fyrri leiknum þrátt fyrir að skapa eitthvað rosalega mörg færi. Ég fæ eitt færi og svo skjótum við í stöngina.“
Víkingar hafa í gegnum tíðina átt þessa keppni en hvernig er tilfinningin að tapa þessum úrslitaleik?
„Það er miklu verri tilfinning. En ég vil óska KA til hamingju, þeir eru vel að þessu komnir. Þeir hafa gert vel í tvö ár að komast í úrslitin og þeir eru glaðir í dag.“
Viðtalið við Aron má sjá í heild sinni í spilaranum hér að ofan.
