Óli var alls ekki sáttur með leik sinna manna í kvöld
FH tapaði 4-1 fyrir Breiðablik á Kópavogsvelli í kvöld í 13. umferð Pepsí-deildar karla. Ólafur Kristjánsson þjálfari FH sagði spilamennskuna alls ekki nógu góða og var að vonum ósáttur við að tapa svona mikilvægum leik með þremur mörkum.
Lestu um leikinn: Breiðablik 4 - 1 FH
„Það segir sig sjálft að þegar þú tapar 4-1 er spilamennskan ekki nægilega góð, það er ekki hægt að týna til eitthvað sem er gott þegar þú færð svona skell."
Gunnleifur Gunnleifsson markmaður Breiðabliks átti stórkostlegan leik og Ólafur hrósaði honum í hástert og sagði hann ástæðu þess að þeir skoruðu ekki fleiri mörk.
„Við eigum í byrjun frábært skot sem Gulli ver. Þegar við erum að reyna enn og aftur að setja á þá er elsti og ef ekki besti markmaðurinn í deildinni frábær í rammanum og heldur þeim inn í leiknum."
FH er búið að fá á sig 10 mörk eftir föst leikatriði í sumar og eftir að þeir fengu á sig annað markið þá var liðið afskaplega opið að sögn Ólafs.
„Við fáum á okkur tíunda markið í sumar úr föstu leikatriði og eftir það var orðið rosalega einfalt fyrir þá að fara í gegnum okkur sem mér fannst mjög fúlt."
Geoffrey Castillion var ekki í leikmannahópi FH í kvöld og eru háværar sögusagnir um að hann sé á leið aftur til Víkings. Ólafur sagði frá því að Geoffrey sé að verða faðir og fékk frí til að fara heim og vera viðstaddur fæðinguna en útilokaði ekki að hann væri á förum.
„Geoffrey er í Hollandi núna þar sem á að setja konuna hans á stað á mánudag eða þriðjudag og hann fékk leyfi til að fara og vera viðstaddur, þess vegna var hann ekki með í dag. Svo hafa verið einhverjar sögusagnir um að hann sé á förum en við skulum sjá hvað setur."
Athugasemdir
