Valur tók á móti botnliði FHL í kvöld á N1-vellinum á Hlíðarenda og sigraði 2-1
Aðspurður um fyrstu viðbrögð eftir leik svaraði Kristján Guðmundsson þjálfari Vals „Það er að fagna sigrinum, það er nottlega fyrst og fremst að ná að landa þessum 3 stigum.“
Lestu um leikinn: Valur 2 - 1 FHL
„Við vorum að spila við FHL sem er búið að breytast mikið í fyrri hlutanum og við vissum ekki alveg út hvað við vorum að fara en það kom fljótt í ljós að það var mikil stemming í andstæðingnum en við skorum þetta glæsilega mark bara í fyrstu sókn sem var bara gríðarlega vel gert en það svæfði okkur einhvern veginn og við komumst ekki nógu vel i takt við leikinn og vorum að gera mörg tæknileg mistök í uppspili, að missa boltann á vondum stöðum og svona og lenda í smá eltingaleik.“
Málfríður Anna gekk á dögunum til liðs við Val og kom strax við sögu þegar hún kom inn á fyrir Natöshu sem þurfti að fara af velli vegna meiðsla í fyrri hálfleik
„Mér fannst hún koma mjög vel inn í leikinn, hún þurfti bara að hlaupa inn á um leið og Natasha meiðist, hún kemur alveg ísköld inn af bekknum og gerði þetta mjög vel, við treystum henni alveg í þetta verkefni, þannig að hún stóð sig vel.“
Næsti leikur Vals er bikarleikur gegn FH nk. þriðjudag klukkan 19:30 á N1-vellinum á Hlíðarenda
„Við erum farin að hugsa ansi mikið um næsta leik, bikarleikur á móti FH og hérna já við förum að vinna í því áfram en það er líka aðeins breytt lið FH, þær eru búnar að styrkja sig töluvert.“
