Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
   fim 04. mars 2010 12:00
Magnús Már Einarsson
3.deild: Hvað er að frétta af Grundarfirði?
Mynd: Grundarfjörður
Tómas Freyr Kristjánsson.
Tómas Freyr Kristjánsson.
Mynd: Grundarfjörður
Mynd: Grundarfjörður
Tryggvi Hafsteinsson þjálfari.
Tryggvi Hafsteinsson þjálfari.
Mynd: Grundarfjörður
Liðurinn "Hvað er að frétta" hefur göngu sína að nýju í dag. Þar er kíkt á stemninguna hjá liðunum í fyrstu, annarri og þriðju deild karla og verður liðurinn á dagskrá reglulega næstu mánuðina.

Það er ekki úr vegi að nýtt lið á Íslandsmótinu ríði á vaðið í "Hvað er að frétta?" í ár en Grundarförður verður með lið í þriðju deildinni í sumar.

Tómas Freyr Kristjánsson svaraði nokkrum spurningum fyrir Grundfirðinga.

Hvernig er stemningin hjá Grundarfirði?
Hún er bara nokkuð góð þessa dagana. Við erum að vinna í því að koma strákunum í form fyrir sumarið. Við erum búnir að spila tvo æfingaleiki og erum að vinna í því að fá fleiri. Hópurinn hjá okkur er að myndast en hann er að mestu byggður upp af strákum héðan af nesinu þó að sumir þeirra séu búsettir í Reykajvík. Þetta lítur ljómandi vel út.

Hvernig er liðið skipað?
Eins og ég sagði þá er liðið mestmegnis skipað af strákum sem eiga rætur héðan af nesinu. Svo eru nokkrir sem hafa verið að spila með Víking Ólafsvík en þurft að hætta þar vegna vinnu eða annara anna. Tryggvi Hafsteinsson hefur tekið við þjálfuninni og er að fá stráka sem voru hættir að spila, til að taka fram takkaskóna aftur. Strákar eins og Ragnar Smári og Hrannar Már Ásgeirsson sem gerðu það gott með Víkingi Ól fyrir nokkrum árum.

Er mikill fótboltaáhugi á Grundarfirði?
Fótboltaáhuginn er mikill hér og hefur aukist eftir að við fórum af stað með þetta. Flestir ungir krakkar æfa og spila fótbolta með Snæfellsnessamstarfinu sem er sameinað lið í öllum yngri flokkunum á Snæfellsnesi. Svo heyrir maður líka á fólkinu hérna í Grundarfirði að það er töluverður spenningur að geta mætt á Grundarfjarðarvöll og horft á fótboltaleiki næsta sumar.

Hvernig er undirbúningstímabilinu háttað hjá ykkur?
Við höfum verið að æfa innanhúss í haust en í janúar byrjuðum við að hlaupa úti og vera með æfingar á sparkvellinum. Tíðin hefur verið mjög góð í janúar og febrúar þannig að við höfum getað æft vel. Svo spiluðum við fyrsta æfingaleikinn 5 febrúar síðastliðinn við KFK og svo spiluðum við leik við Augnablik þann 27 febrúar. Svo förum við að keyra meira á æfingaleiki núna í mars og apríl ásamt því að vera duglegir að hlaupa og æfa.

Hefur þú verið sáttur við spilamennskuna í æfingaleikjum til þessa?
Já þetta lítur ágætlega út. Við töpuðum reyndar fyrir KFK 5-3 en við vorum að spila fínan bolta framan af í þeim leik. Svo áttum við ágætis leik við Augnablik sem við unnum 2-1 þó að aðstæður hafi ekki verið uppá sitt besta enda var sá leikur spilaður úti. Heilt yfir höfum við verið sáttir við þetta.

Hver eru markmið ykkar fyrir sumarið?
Markmiðin eru fyrst og fremst að ná fínum úrslitum í sumar. Við teljum okkur vera með fínt lið sem gæti komið á óvart. Svo er náttúrulega megin markmið að hafa rosalega gaman að þessu og mynda stemmingu í bænum yfir liðinu og heimaleikjum. Þetta verður gaman.

Komdu með eina skemmtilega staðreynd um félagið sem fólk veit ekki um:
80% af liðinu eru uppaldir Grundfirðingar eða hafa mjög sterka tengingu við Grundarfjörð.

Eitthvað að lokum?
Ég vil bara þakka öllum Grundfirðingum og velunnurum liðsins fyrirfram fyrir stuðninginn í sumar. Stefnan er sett á að hafa skemmtilega umgjörð í kringum liðið og heimaleikina svo við fáum sem flesta á völlinn. Áfram Grundarfjörður
banner
banner
banner
banner