Ian skrifaði undir samningi við ÍBV í dag
,,Mér líður bara vel með þetta. Þetta var eitthvað sem við erum búnir að vera í sambandi með í nokkrar vikur að tala um samning og ég er búinn að tala við Heimi og þetta lítur mjög vel út," sagði Ian Jeffs sem í dag skrifaði undir eins árs samning við ÍBV.
,,Auðvitað eru spennandi tímar framundan. Evrópukeppni og það gekk mjög vel hjá þeim síðasta sumar og vonandi að það haldi áfram og það er skemmtilegur tími framundan hjá ÍBV."
Því hefur verið haldið fram að Jeffs hafi átt sinn besta tíma á Íslandi sem knattspyrnumaður þegar hann hefur spilað með ÍBV.
,,Já ég er sammála því. Ég átti mjög góð þrjú og hálft ár í ÍBV og ég hlakka til að byrja aftur í hvítu treyjunni."
Jeffs hefur spilað undanfarin tvö tímabil með Val en samningur hans við félagið rann út í haust. Hvernig var tíminn hjá Val og viðskilnaðurinn við þá?
,,Þetta var svoldið upp og niður, ég spilaði undir stjórn þriggja eða fjögurra þjálfara þar og það gekk illa 2009. Mér fannst þetta vera að ganga vel hjá Willum en eftir að hann hætti að þá gekk svoldið illa og þetta var bara eins í sumar hjá Gulla, gekk vel í byrjun en við kláruðum mótið ekki vel. En eins og ég segi þetta er búið að vera upp og niður," sagði Ian Jeffs í samtali við Fótbolta.net.
Nánar er rætt við hann í sjónvarpinu hér að ofan.
