Tottenham 0 - 1 Chelsea
0-1 Maika Hamano ('37)
0-1 Maika Hamano ('37)
Hin tvítuga Maika Hamano reyndist hetja Chelsea í kvöld þegar liðið heimsótti Tottenham í Lundúnaslag í efstu deild kvenna.
Hamano skoraði eina markið í 0-1 sigri á 37. mínútu, eftir undirbúning frá Guro Reiten.
Chelsea var sterkara liðið í leiknum en tókst ekki að tvöfalda forystu sína. Því stafaði hætta á að Tottenham tækist að jafna leikinn en það varð ekkert úr því, þar sem sóknarleikur Spurs var bitlaus og varnarleikur Chelsea öflugur.
Þetta er gríðarlega dýrmætur sigur fyrir Chelsea sem er í æsispennandi titilbaráttu gegn Manchester City. Liðin deila toppsæti deildarinnar fyrir lokaumferðina, þar sem bæði lið eiga 52 stig eftir 21 umferð en Chelsea er með betri markatölu.
Chelsea er með 47 mörk í plús á meðan Man City er með 45 mörk í plús.
Lokaumferðin verður því gríðarlega spennandi, þar sem Chelsea á erfiðan útileik gegn Manchester United á meðan Man City heimsækir Aston Villa.
Athugasemdir