Síðustu leikir næstsíðustu umferðar franska deildartímabilsins fóru fram í kvöld og verður lokaumferðin spiluð um næstu helgi.
Þar er mikið í húfi þar sem enn er hart barist um mikilvæg sæti í efstu deild franska boltans.
Marseille mætti til leiks í kvöld og tapaði á útivelli gegn Reims. Þetta tap er mikill skellur fyrir Marseille sem þurfti nauðsynlega á sigri að halda í Evrópubaráttunni.
Reims vann 1-0 þar sem varnarmaðurinn Chancel Mbemba, sem lék eitt sinn fyrir Newcastle, skoraði sjálfsmark sem reyndist eina mark leiksins.
Núna þarf Marseille að sigra útileik í Le Havre í lokaumferðinni til að eiga möguleika á Evrópusæti og treysta um leið á að Lyon og Lens tapi sínum leikjum.
PSG er löngu búið að tryggja sér Frakklandsmeistaratitilinn en liðið lagði Nice á útivelli í kvöld.
Nice gat blandað sér í baráttuna um meistaradeildarsæti með sigri en situr nú sem fastast í 5. sæti og endar þar. Fimmta sætið gefur þátttökurétt í riðlakeppni Evrópudeildarinnar.
Bradley Barcola skoraði og lagði upp í sigrinum en Kylian Mbappé var ekki í hóp. Yngri bróðir hans, Ethan Mbappé, var ónotaður varamaður.
Reims 1 - 0 Marseille
1-0 Chancel Mbemba ('33, sjálfsmark)
Nice 1 - 2 PSG
0-1 Bradley Barcola ('18)
0-2 Yoram Zague ('23)
1-2 Mohamed-Ali Cho ('32)
Rautt spjald: M. Bard, Nice ('75)
Athugasemdir