Það komu nokkrir Íslendingar við sögu í leikjum dagsins í Skandinavíu þar sem Gísli Eyjólfsson var í byrjunarliði Halmstad og lagði upp mark í góðum sigri.
Gísli lagði upp þriðja mark leiksins í 3-0 sigri gegn Häcken í efstu deild sænska boltans, þar sem Valgeir Lunddal Friðriksson spilaði seinni hálfleikinn í tapliði Hacken.
Birnir Snær Ingason kom inn af bekknum undir lokin og fékk að spila síðustu mínúturnar í sigri Halmstad, sem er með 15 stig eftir 9 umferðir - einu stigi minna heldur en Hacken.
Andri Fannar Baldursson lék þá allan leikinn í stórsigri Elfsborg á heimavelli gegn AIK á meðan Eggert Aron Guðmundsson fékk að spila síðustu mínúturnar. Leiknum lauk með 6-1 sigri Elfsborg sem er um miðja deild, með 13 stig eftir 9 umferðir.
Í danska boltanum voru Kolbeinn Birgir Finnsson, Sævar Atli Magnússon og Andri Lucas Guðjohnsen allir í byrjunarliði Lyngby sem tapaði 1-0 á útivelli gegn Vejle í jöfnum leik.
Lyngby er í fínni stöðu í fallbaráttunni, sex stigum fyrir ofan OB í fallsæti sem á þó leik til góða þegar aðeins tvær umferðir eru eftir.
Að lokum gæti Panathinaikos misst af Evrópusæti eftir 4-1 tap gegn PAOK í toppbaráttu gríska boltans. Hörður Björgvin Magnússon er fjarverandi vegna meiðsla en Panathinaikos þarf sigur á heimavelli gegn Olympiakos í lokaumferð deildartímabilsins til að komast í Sambandsdeildina næsta haust.
Halmstad 3 - 0 Hacken
Elfsborg 6 - 1 AIK
Vejle 1 - 0 Lyngby
PAOK 4 - 1 Panathinaikos
Athugasemdir
