Leicester komst beint aftur upp í deild þeirra bestu á Englandi eftir eitt ár í B-deild. Liðið var á sínum tíma eiginlega bara of gott til að falla en það gekk einhvern veginn ekkert upp og því fór sem fór. Leicester, sem varð gríðarlega óvænt Englandsmeistari fyrir átta árum síðan, fór niður í eitt tímabil og komst beint aftur upp. Tímabilið í Championship gekk nánast fullkomlega upp frá byrjun. Það var smá erfiður kafli eftir áramót, en annars gekk frábærlega og sætið í úrvalsdeildinni var eiginlega aldrei í hættu.

Leicester varð fyrir áfalli fyrr í sumar þegar Enzo Maresca var ráðinn stjóri Chelsea. Hann tók líka með sér miðjumanninn Kiernan Dewsbury-Hall sem var frábær fyrir liðið á síðasta tímabili. Maresca var sá sem kom Leicester beint aftur upp og félagið fór í ákveðna stefnubreytingu með honum, en svo breyttist það snöggt. Steve Cooper er tekinn við liðinu en hann er með reynslu úr úrvalsdeildinni, annað en Maresca.

Það er stutt síðan Leicester varð Englandsmeistari og þetta er bara félag sem á að vera í úrvalsdeildinni. Ef spáin rætist þá mun Leicester halda sér uppi en þeir verða ekki langt frá fallbaráttunni.

Stjórinn: Steve Cooper er tekinn við skútunni hjá Leicester eftir að Enzo Maresca fór til Chelsea. Refirnir þurftu að fara í stjóraleit í sumar og enduðu á því að ráða Cooper en í honum fá þeir stjóra með úrvalsdeildarreynslu sem var feikilega vinsæll sem stjóri Forest en var látinn taka pokann sinn þaðan um mitt síðasta tímabil. Cooper er 44 ára en áður en hann tók til starfa hjá Nottingham Forest, þá var hann stjóri Swansea og yngri landsliða Englands.

Leikmannaglugginn: Stærstu kaup Leicester hingað til í sumar hafa verið á leikmanni sem var á láni hjá þeim á síðustu leiktíð. Þetta hefur verið frekar rólegur gluggi hjá Leicester en hópurinn er ekki veikur.

Komnir:
Abdul Fatawu frá Sporting - 17 milljónir punda
Caleb Okoli frá Atalanta - 13 milljónir punda
Michael Golding frá Chelsea - 4 milljónir punda
Bobby De Cordova-Reid frá Fulham - Á frjálsri sölu

Farnir:
Kiernan Dewsbury-Hall til Chelsea - 30 milljónir punda
Harry Souttar til Sheffield United - Á láni
Kelechi Iheanacho til Sevilla - Á frjálsri sölu

Lykilmenn:
Wout Faes - Belgískur miðvörður með athyglisverða hárgreiðslu. Átti ekki sitt besta tímabil síðast þegar Leicester var í ensku úrvalsdeildinni en hann lék mjög vel með liðinu í Championship. Hann var þá byrjunarliðsmaður í vörn Belgíu sem var mjög sterk á Evrópumótinu í sumar.

Harry Winks - Miðjumaður sem lék frábærlega með liðinu í Championship. Var orðinn týndur hjá Tottenham en fann sig betur þegar hann skipti yfir til Leicester. Ef hann heldur áfram uppteknum hætti frá síðasta tímabili þá kemur hann til með að snúa aftur í enska landsliðið fyrr eða síðar.

Jamie Vardy - Er enn mikilvægur þrátt fyrir að vera að vera kominn vel á aldur. Vardy er 37 ára gamall en hann var samt sem áður markahæsti leikmaður liðsins með 20 mörk á síðasta tímabili. Það hlýtur að fara að hægjast á honum en fyrir tímabilið getur hann enn talist sem lykilmaður. Hann var auðvitað hluti af liðinu 2016 sem varð Englandsmeistari.

„Það þarf endurvekja þann anda"

Gunnþór Sigurðsson er stuðningsmaður Leicester en við fengum hann til að segja okkur aðeins meira frá liðinu og áhuga sínum á því fyrir komandi tímabil.

Ég byrjaði að halda með Leicester af því að... Fór að halda með Leicester því að fyrsta sem ég man eftir að hafa séð af enska boltanum í sjónvarpinu var leikur með Leicester. Svo voru allir að halda með Liverpool eða Man U en það kom ekki til greina að halda með liði í rauðu sem KR-ingur.

Áttu uppáhalds minningu tengda félaginu þínu? Uppáhalds minningin er þegar þeir unnu deildina 2016. Það var gjörsamlega sturlað

Uppáhalds leikmaður allra tíma? Uppáhalds leikmaður er Steve Walsh gaf aldrei tommu eftir.

Hvernig fannst þér síðasta tímabil? Síðasta tímabil fór í að komast upp aftur eftir að hafa fallið. Hélt að þetta væri að klúðrast en hafðist fyrir rest.

Ertu með einhverja sérstaka leikdagshefð? Steve Cooper hefur verið hræra í þessu fram og til baka á undirbúningstímabilinu þannig það væri fyrir þig að spyrja hann.

Hvern má ekki vanta í liðið? Það er enginn ómissandi. Liðsheildin vann þennan ótrúlega sigur 2016, það þarf endurvekja þann anda.

Hver er veikasti hlekkurinn? Veikasti hlekkurinn á síðasta tímabili var varnarleikurinn.

Þessum leikmanni á að fylgjast með... Vardy er vissulega farinn að dala en hann er enn frábær.

Við þurfum að kaupa... Leicester vantar sárlega markaskorara sem er á pari við Vardy.

Hvað finnst þér um stjórann? Það var áfall að missa Enzo sem þjálfara og Cooper þarf að sanna sig. Hann er ofarlega á lista hjá veðbönkum um fyrsta þjálfaran sem verður rekinn á komandi tímabili.

Hvernig líður þér fyrir tímabilinu sem er framundan? Ég vona að Leicester nái að halda sér uppi á meðal þeirra bestu.

Hvar endar liðið? Um miðja deild væri frábært.

Þau sem spáðu: Arnar Laufdal Arnarsson, Brynjar Ingi Erluson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Ívan Guðjón Baldursson, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. ?
13. ?
14. ?
15. ?
16. Leicester, 61 stig
17. Brentford, 56 stig
18. Southampton, 42 stig
19. Nottingham Forest, 37 stig
20. Ipswich Town, 27 stig

Athugasemdir