Gunnhildur á æfingunni í dag.
Gunnhildur Yrsa Jónsdóttir, miðjumaður íslenska landsliðsins, ræddi við Fótbolta.net eftir æfingu liðsins í Þýskalandi í dag.
Gunnhildur var þar spurð út í fyrirliðastöðuna í landsliðinu. Gunnhildur hefur verið með bandið í síðustu verkefnum, en Sara Björk Gunnarsdóttir er mætt aftur í liðið og verður fyrirliði liðsins á EM.
„Ég er alls ekki svekkt,” segir Gunnhildur sem var með skemmtileg sólgleraugu í viðtalinu.
„Sara er búin að vera fyrirliði. Ég fékk þann heiður að bera það á meðan hún var í burtu. Ég vissi að þetta væri staðan. Hún er búin að vera fyrirliði í landsliðinu og er geggjaður leiðtogi. Ég mun alltaf gefa henni bandið. Hún er frábær leiðtogi, geggjaður leikmaður og á þetta skilið.”
Það skiptir örugglega ekki öllu máli hver verður fyrirliði liðsins á EM þar sem það eru margar raddir í liðinu. Fyrirliðinn á samt sem áður að vera helsti leiðtogi liðsins innan sem utan vallar og hjálpa til við að halda góðum anda í hópnum.
„Það gæti hver sem er verið með fyrirliðabandið. Það er það góða við þetta lið. Við erum allar tilbúnar að stíga upp. Ég dýrka að vera í þessum hóp og það eru algjör forréttindi að vera hérna.”
Hér fyrir ofan má sjá allt viðtalið. Þar ræðir Gunnhildur aðeins um leikinn á móti Póllandi og svo framhaldið á EM.
Athugasemdir
