Fylkiskonur héldu sigurgöngu sinni áfram í kvöld með góðum 2:0 sigri á botnliði deildarinnar, HK/Víkingi. Cecilía Rán, markmaður Fylkis, var að vonum kát í leikslok.
Lestu um leikinn: HK/Víkingur 0 - 2 Fylkir
"Já þetta er bara geggjað, 5 sigrar komnir í röð núna og þetta er bara geggjaður tími til að vera til."
"Mér fannst við ekki byrja það vel, fyrri hálfleikur smá ragur. Við vorum þó allan tímann með leikinn í höndunum og gáfum þeim ekkert mikið af færum á okkur. Svo kláruðum við okkar færi sem er mikilvægt. Það er svo alltaf gaman að halda hreinu en það er bara auka bónus, 3 stig eru aðalatriðið."
Fylkir hefur spilað gríðarlega vel upp á síðkastið og unnið 5 leiki í röð. Afhverju gengur svona vel núna?
"Já við settum okkur aðeins minni og skýrari markmið og þau eru bara að virka 100% á okkur. Nú verðum við bara að halda áfram, það eru fullt af leikjum eftir og nú verðum við að gefa allt í botn."
Næsti leikur Fylkis er gegn toppliði Vals. Hvernig leggst það í liðið?
"Það er alltaf erfitt að mæta þessum tveimur liðum sem eru að berjast um Íslandsmeistaratitilinn en við ætlum bara að reyna að hafa áhrif á það hver verður Íslandsmeistari og gefa allt í þann leik. Eins og við sýndum á móti Breiðablik að við getum unnið hvaða leik sem er."
Viðtalið má sjá í heild sinni hér að ofan.
Athugasemdir
