„Við fengum bara í andlitið það sem við áttum skilið. Þetta var gjörólíkt Þórslið miðað við hina tvo leikina sem við höfum séð í sumar, því miður," sagði Orri Freyr Hjaltalín þjálfari Þórs eftir 4 - 1 tap úti gegn Fram í Lengjudeild karla í kvöld.
Lestu um leikinn: Fram 4 - 1 Þór
„Við höfum oft átt í ströggli í Reykjavík í gegnum tíðina og andlega voru alltof margir leikmenn hjá mér úti á þekju. Við hálfbrotnuðum í fyrri hálfleik og fengum á okkur tvö ódýr mörk. Eftir það var leikurinn bara búinn."
Heyra mátti á Frömurum að þeir hafi búist við meiri látum í Þórsliðinu í dag en það hafi aldrei orðið neitt úr því.
„Orkan sem við lögðum í síðasta leik miðað við orkuna sem við lögðum í þennan leik er eins og svart og hvítt. Það er eitthvað sem við þjálfararnir þurfum að skoða. Hvað við gerðum öðruvísi fyrir þenna leik en Grindavíkurleikinn. Það vantaði svakalega mikið í dag."
Nánar er rætt við Orra í sjónvarpinu að ofan. Hann segir þar frá því afhverju gengur illa í Reykjavík, að flugi liðsins í leikinn hafi verið aflýst og markmið sumarsins.
Athugasemdir