„Þetta er algjör skellur og langt frá því sem við ætluðum að gera,“ sagði hundsvekktur Jóhannes Karl Sigursteinsson, þjálfari KR, eftir 6-0 tap gegn Breiðablik á Kópavogsvelli.
Lestu um leikinn: Breiðablik 6 - 0 KR
„Í raun og veru fannst mér við koma ágætlega inn í leikinn og byrjum fyrstu 5 mínúturnar betur en síðustu leiki. En svo lendum við undir. Við finnum það fljótlega að þær hafa mikinn hraða og ógna hátt upp. Í staðinn fyrir að þora að halda okkar leikskipulagi fannst mér við falla til baka alltof snemma og opna liðið upp á gátt. Þegar þú gerir það á móti liði eins og Breiðablik þá færðu það bara í andlitið,“ sagði Jóhannes Karl um leikinn og talaði um hugarfarið og óttann við að halda skipulagi.
„Mér fannst einhver hræðsla í liðinu í dag og það kemur mér á óvart því ef maður lítur yfir leikmannahópinn þá er þetta feykilega sterkt lið á pappírunum.“
KR hefur verið spáð ýmist í 4. eða 5. sæti deildarinnar og leikmenn og þjálfarar hafa talað um að að markmið liðsins sé að berjast í efri hlutanum. Eftir þrjá fyrstu leiki mótsins er liðið hinsvegar stigalaust með ellefu mörk í mínus á botni deildarinnar.
„Þetta er nýbyrjað og það er nóg eftir af fyrri helmingi mótsins,“ sagði Jóhannes Karl.
„Eins og staðan er í dag þá getum við ekki litið á okkur sem eitthvað lið sem er í efri hlutanum. Við erum í neðri hlutanum og þurfum stig til að koma okkur upp í efri hlutann. Við þurfum þrjú stig í næsta leik.“
Hægt er að horfa á allt viðtalið í spilaranum hér að ofan.
Athugasemdir