Víkingur tók á móti Val í lokaumferð Bestu deildar karla. Heimaliðið hafði yfirhöndina stærstan hluta leiksins og tryggði sér öruggan 2-0 sigur. Að leik loknum fagnaði Víkingur Íslandsmeistaratitlinum á Víkingsvelli, þar sem stemningin var einstaklega góð og mikil ánægja með árangurinn í leikslok. Matthías Vilhjálmsson kvaddi Víkina og fótboltann en hann var að spila sinn síðasta leik og kórónaði hann með marki. Fékk hann heiðursskiptingu fyrir vikið.
„Þetta var skrítið. Maður var byrjaður að hugsa þetta svona 5 mínútum áður, að þetta gætu verið síðustu mínúturnar en bara yndislegur dagur og geggjaður endir á frábæru tímabili hjá liðinu og á mínum ferli, þannig að ég er bara gífurlega þakklátur.”
Lestu um leikinn: Víkingur R. 2 - 0 Valur
Matthías Vilhjálmsson var á skotskónum í leiknum en það var viðeigandi að hann myndi skora í kveðjuleiknum.
„Þetta var næstum því of gott til að vera satt og Stefán varði þarna helvíti vel frá mér í byrjun leiks en bara vel gert hjá Óskari að koma honum á mig og mjög gaman að ná að enda þetta á marki.”
Matthías Vilhjálmsson hefur færst aftar á völlinn með aldrinum en hann rifjaði upp gamla takta í dag og spilaði einn frammi.
„Ég er búinn að reyna að segja þeim að ég sé framherji allan tímann. Geggjað að spila með svona góðum leikmönnum, þegar þeir reyna að finna þig trekk í trekk. Þetta eru forréttindi,” sagði Matti í gamansömum tón.
Matthías Vilhjálmsson hefur átt ansi farsælan feril í atvinnumennsku og staðið sig með prýði hvar sem hann hefur komið.
„Já, ég var rosalega heppinn að byrja ferilinn í FH og geggjaðir tímar þar. Unnum einhverja fjóra íslandsmeistaratitla á fimm árum. Íslenskur fótbolti er alltaf að verða betri og betri og árangurinn í Evrópu - mæta Pantathinaikos og fá stig í Evrópu. Vinna þrjá titla á þremur árum, geggjað.”
Viðtalið í heild má nálgast í spilaranum að ofan en þar fer Matti vel yfir ferilinn.
