Bjarni Guðjónsson.
Bjarni Guðjónsson var eins og gefur að skilja ekki ánægður með að tapa 3-0 gegn Víkingum í dag en sá þó ljósa punkta í frammistöðu sinna manna.
,,Þeir eru með hörkugóða leikmenn, Aron er rosalega flinkur í því að finna sér svæði á milli varnar og miðju. Það er ekki hægt að loka alveg á allt en þeir leysa það mjög vel."
,,Mér fannst fyrri hálfleikurinn okkar spilast nokkuð vel, við fáum þrjú fín færi. Þeirra færi voru meira í skotum fyrir utan teig."
,,Við nýtum ekki færin okkar og byrjum seinni hálfleikinn aldrei af miklum krafti og fáum á okkur þrjú klaufaleg mörk."
Bjarni segir að sjálfstraustið sé ekki mikið enda er liðið á botninum.
,,Sjálfstraustið í liðinu er ekki mikið, við erum í neðsta sæti og þá fylgir það að það er ekki mikið sjálfstraust. En við erum að vinna í því markvisst að telja mönnum trú."
,,Við viljum taka sjálfstraust úr fyrri hálfleiknum, við opnuðum Víkingana nokkrum sinnum."
Þrátt fyrir afar dapurt gengi upp á síðkastið er Bjarni ekki af baki dottinn og hefur trú á sínum mönnum.
,,Já, ég hef mikla trú á því, það sýnir sig í fyrri hálfleik að það eru fullt af gæðum. Við þurfum að stíga fastar til jarðar og koma inn í seinni hálfleikinn af sama krafti og við komum inn í þann fyrri."
Jóhannes Karl Guðjónsson, spilaði í vinstri bakverðinum en hann er þekktur fyrir að spila á miðjunni, Bjarni var sáttur við hans framlag í leiknum.
,,Ég var mjög ánægður með hann, mikið af spilinu í fyrri hálfleiknum fór í gegnum hann. Hann er sterkur varnarlega, ég var tiltölega sáttur við hans frammistöðu."
Viðtalið í heild sinni má sjá í sjónvarpinu hér fyrir ofan.
Athugasemdir
