„Ég er alltaf ótrúlega stolt af því að vera fyrirliði þessa liðs en ég er extra stolt í dag.“ sagði Elísa Viðarsdóttir, fyrirliði Vals, í samtali við Fótbolta.net eftir að hún varð bikarmeistari með liði sínu Val.
„Það var skrekkur í okkur í fyrri hálfleik og mér fannst við ekki vera að sýna okkar rétta andlit. Í hálfleik ræddum við það að reyna að sækja í okkar gildi og vera við sjálfar og spila okkar fótbolta. Sem mér fannst við gera. Við mættum til leiks í seinni hálfleik og gerðum ótrúlega vel,“ sagði Elísa en Valskonur unnu 2-1 sigur eftir að hafa farið marki undir inn í hálfleikinn.
Það er langt síðan Valur vann síðast en það var tímabilið 2011. Elísa segir leikmenn Vals hafa verið meðvitaðar um það og viljað sækja bikarinn á ný.
„Það var svolítið umræðan í aðdraganda leiksins. Það er langt síðan við lönduðum þessum titli heim á Hlíðarenda. Ég held að það sé okkar ár í ár og við ætlum okkur auðvitað að taka tvennuna,“ sagði Elísa sem ætlar að sjálfsögðu að fagna titlinum vel.
„Maður á að fagna öllum sigrum. Hvort sem þeir eru stórir eða smáir og þessi er svolítið stór. Við ætlum okkur að njóta þess,“ sagði Elísa að lokum en hægt er að horfa á allt viðtalið við hana í spilaranum hér að ofan.
Athugasemdir