,,Þetta gekk ekki nógu vel í dag. Þróttararnir voru viljugri og skoruðu þetta mark upp úr horni og það er vont að fá á sig svona úr föstum leikatriðum. En þeir vildu þetta meira og þetta var sanngjarnt þegar á heildina er litið," sagði Hjörtur Júlíus Hjartarson framherji ÍA eftir 0-1 tap gegn Þrótti í VISA-bikarnum í kvöld.
,,Mér fannst þeir alltaf líklegri, það var meiri vilji og barátta í þeim. En auðvitað áttum við að skora og gefa þeim meiri leik heldur en við gáfum þeim. En þetta fór svona, við áttum að geta fengið eitthvað út úr þessum leik en fengum ekki neitt."
Liðin mætast svo að nýju í 1. deildinni á laugardag og þá gefst ÍA kostur á að hefna tapsins í kvöld.
,,Jájá en það er bara svo rosalega grátlegt að vera kominn í 16 liða úrslit og fá heimaleik gegn liði í sömu deild og þú og vera með svona góðan möguleika á að komast í 8 liða úrslit."
,,Svo eru fleiri lið úr þessari deild ennþá í pottinum, og meira að segja fyrir neðan okkur líka, svo það þarf ekki mikið að gerast svo maður sé kominn hálfa leið á Laugardalsvöllinn er því er að skipta. Við vorum þarna í dauðafæri að komast svolítið langt."
,,Jújú, það verður gaman að fá að mæta þeim aftur á laugardaginn, en það er önnur keppni og við þurfum að vinna þar. Þeir fá ekki alveg svona silkimjúka meðferð á laugardaginn, ég ætla að vona það allavega."
Nánar er rætt við Hjört í sjónvarpinu hér að ofan en Hjörtur ræðir meðal annars um að hann æfi ekki mikið þessa dagana útaf HM en hann er íþróttafréttamaður á RÚV.
,,Ég hef rosalega gaman af þessu en fyrst og síðast vonast ég að ég geti nýst liðinu á einhvern hátt. Ég verð að fara að drullast til að skora til að gera það, ég hjálpa þeim lítið með því að koma af bekknum og skora ekki eða vera á byrjunarliðinu og skora ekki. Það er svona mitt markmið allavega.
