Óli Stefán Flóventsson, spilandi þjálfari Sindra, var ánægður eftir 7-2 sigur liðsins á Hvíta riddaranum í 3.deildinni í dag. Sindri er eftir sigurinn í þriðja sæti í A-riðli en liðið setur stefnuna á að komast í úrslitakeppnina.
,,Það er markmiðið hjá okkur í smar að komast í úrslitakeppnina. Þetta er hörkuerfiður riðill og hörkufín fótboltalið þarna. Það má ekkert út af bregða, það eru 4-5 lið sem koma til með að berjast um þetta," sagði Óli Stefán við Fótbolta.net.
Óli Stefán tók við Sindra síðastliðið haust og hann kann vel við sig á Höfn í Hornafirði.
,,Ég er sveitamaður sjálfur úr Grindavík og kann vel við sveitalífið. Það fer mjög vel um mig og fjölskylduna þarna, þetta er stórfínt."
Óli Stefán leikur sjálfur í vörninni hjá Sindra og hann segist vera í fínu formi núna eftir að hafa verið gagnrýndur í fyrra fyrir að vera ekki í nógu góðu standi.
,,Ég tók mér eitthvað af kílóum. Eftir mikla pressu frá þeim í fyra þá varð ég að létta mig aðeins og ég er í góðu standi núna."
Hér að ofan má sjá viðtalið í heild sinni.
