Steini Halldórs
Leikdagar Íslands.
Ásta Eir er komin aftur í landsliðið eftir ríflega tveggja ára fjarveru.
„Hingað til hefur þetta verið mjög stórt mót, Bandaríkin er mjög stór þjóð í kvennaboltanum og það er mikið umstang í kringum þeirra landslið. Þetta hefur verið flott mót, fullt af áhorfendum og stemning í kringum það. Við lítum á þetta sem flott tækifæri, svona aðeins öðruvísi æfingamót heldur en liðið hefur verið að fara á undanfarin ár," sagði Þorsteinn Halldórsson, þjálfari kvennalandsliðsins, í viðtali við Fótbolta.net í dag.
Viðtalið í heild má sjá í spilaranum að ofan
Viðtalið í heild má sjá í spilaranum að ofan
Þorsteinn kynnti landsliðshópinn fyrir SheBelieves Cup í Bandaríkjunum í dag og var til viðtals í kjölfarið.
Skoðaðu hópinn:
Hópurinn sem fer á SheBelieves Cup: Ásta Eir í hópnum
Ísland mætir Nýja-Sjálandi, Tékklandi og Bandaríkjunum í mótinu. Hvernig líst þér á þá?
„Bara vel, Nýja-Sjáland er flott lið sem við höfum einu sinni spilað við, árið 2016 og fór sá leikur 1-1. Andrea Rán skoraði minnir mig (Ísland mætti Nýja-Sjálandi á Algarve 2016). Þær eru á svipuðum stað og við, númer nítján á styrkleikalista, eru með flott, sterkt lið og kröftugt lið. Tékkana þekkum við [erum með þeim í riðli í undankeppni HM] náttúrulega og Bandaríkin er náttúrulega bara besta þjóð í heimi og verður virkilega gaman að sjá okkur kljást við þær, gaman að takast á við kraftinn og hraðan í þeim."
Horfiru meira í úrslitin eða frammistöðuna?
„Auðvitað horfir maður meira í frammistöðuna en auðvitað vonast maður til að vinna allt sem maður fer í og það er alltaf planið að fara í þessa leiki til að vinna. Við förum ekki í þetta mót bara til að taka þátt. Yfirleitt fylgir frammistaða úrslitum og ég vil sjá liðið halda áfram að þróast, halda áfram að gera góða hluti og halda áfram að stíga upp á móti stærri þjóðum. Það er það sem við þurfum að venja okkur á, að geta gert góða hluti á móti stærri þjóðum."
Var lögð mikil áhersla að komast inn á þetta mót eða var þetta eitthvað sem kom upp í hendurnar á KSÍ?
„Bæði og, við spurðumst fyrir um þetta, þetta var svolítið langt ferli og það voru einhverjar aðrar þjóðir sem voru líka inn í þessu og á endanum fengum við boð um að fara á mótið. Við vonuðumst eftir því að komast á mótið út af umgjörðinni í kringum það og bara jákvætt að fá að taka þátt í því. Við hefðum alveg getað farið á Pinatar eða Algarve, það voru möguleikar í stöðunni fyrir okkur en mér fannst þetta mest spennandi."
Ein breyting er á landsliðshópnum frá síðasta verkefni, hver er hugsunin á bakvið þá breytingu að fá Ástu Eir Árnadóttur inn í hópinn?
„Guðný Árnadóttir er meidd og við þurftum að taka inn annan hægri bakvörð. Ég taldi Ástu hafa verið að stíga upp seinni part Íslandsmótsins og svo í framhaldinu í Meistaradeildinni. Ásta er sterk varnarlega og ágæt sóknarlega þannig ég taldi hana vera tilvalna í þetta."
Varstu að íhuga að gefa einhverjum nýliðum tækifæri í þessu verkefni eða horfðiru í að móta hópinn frekar fyrir lokakeppni EM í sumar?
„Það voru alveg 1-2 nýliðar sem komu alveg til greina en í grunnin var þetta valið úr sama kjarnanum. Það voru 1-2 sem við vorum að spá í en ákváðum að breyta ekki meira en ég gerði," sagði Steini.
Athugasemdir
