„Mér fannst alveg skemmtilegt að spila leikinn. Við gerðum okkar besta. Við fórum auðvitað í leikinn til að vinna en Breiðablik vildi þetta aðeins meira,“ sagði Berglind Rós Ágústsdóttir, fyrirliði Fylkis, eftir 5-0 tap gegn Breiðablik í kvöld.

Lestu um leikinn: Breiðablik 5 -  0 Fylkir

Fylkisliðið fékk mark á sig strax á 5. mínútu en náði að verjast nokkuð vel gegn sterku liði Blika í fyrri hálfleik. Allt þar til Agla María náði að skora annað mark Breiðabliks rétt fyrir hálfleik. Það var ekki sami kraftur í Fylkisliðinu í seinni hálfleiknum og Blikar náðu að skapa sér fjölmörg marktækifæri.

„Við ætluðum bara að fara í seinni hálfleikinn eins og þann fyrri. Kannski var hugarfarið ekki alveg í lagi. Mér fannst við ekki nógu grimmar í seinni hálfleik og mér fannst Breiðablik bara virkilega vilja vinna þetta,“ sagði Berglind Rós.

Nú er Íslandsmótið hálfnað og Fylkisliðið situr í 8. sæti með 7 stig, stigi meira en HK/Víkingur og KR sem sitja í fallsætunum. Við spurðum Berglindi Rós hvort hún væri sátt við uppskeruna þennan fyrri hluta móts.

„Já og nei. Auðvitað viljum við vera með fleiri stig en við höldum bara áfram. Það er nóg af leikjum eftir.“

Hægt er að horfa á allt viðtalið við Berglindi Rós í spilaranum hér að ofan.

Tweet

Senda a Facebook Hafdu samband Senda frétt Prenta frétt Frétta leit