"Jú þetta var vissulega allur tilfinningaskalinn. Við getum verið sammála um það. Sem betur fer endaði þetta réttum megin á skalanum þegar það var flautað af," sagði kampakátur Ómar Ingi Guðmundsson, þjálfari HK, eftir dramatískan 2-1 endurkomusigur gegn Selfyssingum í kvöld.
Lestu um leikinn: Selfoss 1 - 2 HK
"Það var gífurlegur karakter í mínu liði. Þeir komust í 1-0 sem var virkilega ósanngjarnt þar sem dómarinn ákvað að flauta aukaspyrnuna á þegar markmaðurinn minn stóð út við stöng og er að stilla upp veggnum. Það var erfitt í smá stund eftir það en það er karakter, reynsla og gæði í liðinu og við náðum að láta það skína í gegn þó við höfðum bara verið 10 inná á endanum."
Hann segir sigur sinna manna síður en svo ósanngjarnan.
"Auðvitað fóru tvö víti forgörðum hjá þeim og miðað við það vilja kannski einhverjir meina að þetta sé ósanngjarnt en ég held við höfum verðskuldað að fara með sigur frá Selfossi. Þetta var kannski full tæpt en það hefur verið svolítið þannig hjá okkur. Við erum að vinna 2-1 tvo leiki í röð og ég veit að konan mín er að verða vitlaus á þessu. Það heldur mér við efnið að vita af henni arkandi um stúkuna þegar staðan er svona. Ég væri til í stærri sigra en þessir eru líka helvíti sætir."
Allt viðtalið við Ómar má sjá í spilaranum hér að ofan
