Tilfinningaleikur.
„Þetta er súrt. Við komum hingað til að sækja þrjú stig," sagði Atli Sveinn Þórarisson, annar þjálfara Fylkis, eftir tap sínum gömlu heimaslóðum í kvöld.
Lestu um leikinn: Valur 3 - 0 Fylkir
Lokatölur voru 3-0. Það vantaði herslumuninn hjá Fylki í sóknarleiknum. „Við vorum ekki alveg nægilega beittir fram á við. Við erum að spila ágætlega inn á vellinum en ekki nægilega beittir inn á teig."
„Við erum með fullt af mönnum sem geta skorað mörk og þeir munu bara gera það í næstu leikjum."
Valdimar Þór Ingimundarson var fremsti maður Fylkis stærstan hluta leiksins og hann átti ekki sinn besta dag. „Hugsunin var að fara á bak við Valsarana, þeir standa oft frekar hátt með línuna, við ætluðum að sækja bak við en gerðum það ekki nægilega oft."
Atli virkaði oft á tíðum pirraður á hliðarlínunni. Sá pirringur beindist bæði að dómurum og leikmönnum síns liðs. Fylkismenn voru ósáttir við annað markið sem kom upp úr horni. Þeirra hæsti maður, Ásgeir Eyþórsson, var utan vallar þegar Sebastian Hedlund skoraði með skalla.
„Það sem við vorum ósáttir með þar er að dómarinn skipar Ásgeir út af í aðhlynningu. Það er mjög slæmt að missa hann af velli í föstum leikatriðum. Þeir setja boltann beint á svæðið þar sem hann á að vera," sagði Atli Sveinn.
Viðtalið má sjá í heild sinni hér að ofan. Við biðjumst velvirðingar á vindhljóðum í viðtalinu.
Athugasemdir
