„Það er ólýsanleg tilfinning, maður snéri sér bara við og sá allt fólkið, þetta var gæsahúð og maður varð tilfinningaríkur, það var erfitt að halda tárunum til baka og þetta var æðisleg tilfinning."

Hann segist varla muna eftir því að hafa lagt upp sigurmarkið á Arnór Ingva alveg í lokin.

„Nánast ekki, maður var í hálfu blackouti á eftir. Ég kom inn og gerði það sem ég átti að gera að reyna að halda boltanum fyrir liðið og berjast. Það heppnaðist vel í dag, það er yndislegt að spila með þessum strákum."

Hann var ekki alveg viss hvað hann ætlaði að gera, fyrst þegar hann fékk færið til að fara upp kantinn.

„Það komu nokkrar hugmyndir. Á ég að fara sjálfur eða ekki, svo sá ég tvo menn koma þarna. Þeir voru opnir og að gefa á þá var það eina í stöðuni."

Hann segir liðið vera öruggt, þó það hafi lent undir mikilli pressu, sérstaklega í seinni hálfleik.

„Það var komið mikið stress, þeir voru að spila vel og setja okkur undir pressu og það var ein ástæða þess að að ég kom inná til að halda boltanum og við náðum að skapa okkar færi þrátt fyrir að við vorum undir pressu en þó svo við séum undir pressu þá er maður alltaf öruggur með Kára og Ragga þarna."

Hann er spenntur fyrir leiknum við England í 16-liða úrslitunum.

„Það er ein af stærstu fótboltaþjóðum heims og það er mesti fókusinn af öllum á þeim og það verður risa stórt aftur. Við þurfum að safna kröftum til að eiga séns í þá en við eigum séns og við erum bara spenntir," sagði Theodór Elmar.