"Ég er mjög sáttur. Við komumst 2-0 yfir snemma leiks en svo voru þeir allt í einu búnir að jafna og koma okkur aftur niður á jörðina," sagði Dean Martin, þjálfari Selfoss, eftir 3-2 sigur sinna manna gegn HK í fyrsu umferð Lengjudeildarinnar í dag.
Lestu um leikinn: HK 2 - 3 Selfoss
"Spilamennskan var nokkuð góð. Í fyrsta leik snýst þetta bara um baráttu og vilja eftir langan vetur," bætti Dean við.
Selfyssingum var almennt spáð um miðja deild, jafnvel aðeins neðar, í spám fyrir tímabilið. Dean var næst spurður hvort það væri í takt við hans væntingar eða hvort liðið stefni hærra "Hold your horses. Þetta er bara fyrsti leikurinn og við förum bara í alla leiki til að reyna að ná í úrslit. Við förum ekki að missa hausinn þó við höfum náð í einn sigur. Við njótum í kvöld og svo er það bara back to basics á æfingu á morgun."
Þá telur Deano það ólíklegt að hann bæti við leikmönnum í liðið áður en glugginn lokar.
