Orri Freyr Hjaltalín, þjálfari Þórs, var súr á svip í kvöld eftir leik liðsins við Víking Ólafsvík í Lengjudeildinni.
Lestu um leikinn: Víkingur Ó. 2 - 2 Þór
Þórsarar þurftu að sætta sig við eitt stig í þessum leik en liðið endaði leikinn tveimur mönnum fleiri eftir rauðu spjöld Emmanuel Eli Keke og Kareem Isiaka hjá Víkingum.
Staðan var 2-1 fyrir Þór þegar 19 mínútur voru eftir og þá tveimur mönnum fleiri. Víkingum tókst þrátt fyrir það að jafna er Marteinn Theodórsson skoraði á 80. mínútu.
Orri var ekki ánægður með frammistöðu síns liðs og var í skýr í viðtali eftir lokaflautið.
„Ég er gríðarlega svekktur með hvernig loka niðurstaðan var. Við vorum ólíkir sjálfum okkur í dag og vorum lélegir allan leikinn," sagði Orri.
„Við vorum komnir í mjög ágætlega stöðu, marki yfir og fyrst einum og svo tveimur mönnum fleiri en þeir bara unnu fyrir þessu jöfnunarmarki og því er þetta grautfúlt. Þetta eru tvö stig sem við fáum ekki."
„Það er hægt að taka til einhverjar afsakanir en þetta er leikstaða sem við eigum að loka alla daga. Ég hef sagt það áður að við séum ekki nógu tilbúnir að vera í einhverri toppbaráttu en það voru margir af mínum strákum sem voru ekki tilbúnir í þennan leik."
Nánar er rætt við Orra í spilaranum hér fyrir ofan.
Athugasemdir