„Það má að mörgu leiti segja að ég sé kominn heim," sagði Húsvíkingurinn Ásmundur Arnarsson við Fótbolta.net í dag eftir að hafa skrifað undir þriggja ára samning við Fjölni en hann stýrði liðinu líka 2004 - 2011.
„Ég átti hérna frábær sjö ár, frábærar minningar og á þeim tíma náði þetta félag stórum rótum í mínu hjarta."
Ási þjálfaði kvennalið Augnabliks og 2. og 3. flokk kvenna hjá Breiðabliki í fyrra. Hann segir að það hafi verið erfitt að fá hann þaðan en Augnablik vann 2. deildina og hann var valinn þjálfari ársins í deildinni.
„Auðvitað var þetta alltaf pínu spennandi því félagið og ég eigum þessa sögu, en ég var í öðru verkefni sem var að ganga vel og er mér mjög kært hjá Breiðabliki. Ég ætlaði mér alltaf að halda því verkefni áfram því ég var í uppbyggingarstarfi þar með unga og efnilega leikmenn í 2. og 3. flokki og Augnabliki. Þess vegna tók smá tíma að lenda þessu þó þetta hafi alltaf verið heillandi kostur."
Nánar er rætt við Ása í sjónvarpinu hér að ofan. Þar er meðal annars rætt við hann um Powerpoint kynningu sem tvíburabræðurnir Geir og Kolbeinn Kristinssynir tóku saman sem seldi honum þá hugmynd að semja við Fjölni eftir að hann hafði hafnað félaginu.
„Þetta var erfið og flókin ákvörðun fyrir mig, niðurstaðan í síðustu viku var að halda áfram í því sem ég var, en það er bara ekki hægt að segja nei við þessa menn! Þeir fengu mig til að koma og kíkja á fund. Þar fóru þeir vel yfir hverjir væruí kringum þetta og hverslags starfsemi væri hérna í gangi. Það var farið vel yfir hlutina og ég var tilbúinn að endurskoða málið og sló til að vel íhuguðu máli. Ég lít á þetta sem gríðarlega spennandi kost," sagði hann að lokum.
Athugasemdir