Sverrir Ingi Ingason stóð vaktina í vörninni þegar Ísland tapaði 3-0 fyrir Belgíu í Þjóðadeildinni á Laugardalsvelli í kvöld.
Lestu um leikinn: Ísland 0 - 3 Belgía
Sverrir spilaði allan leiktímann í báðum leikjunum í þessu landsliðsverkefni. Fyrst í 6-0 tapi gegn Sviss og í kvöld gegn Belgíu. Líklega ekki skemmtilegustu landsleikir sem hann hefur spilað.
„Mér fannst liðið spila töluvert betur í dag en á laugardaginn. Það hvernig leikurinn fór á laugardaginn, það var ekki ásættanlegt. Við vorum staðráðnir í að koma til baka og sýna það að við gætum varist sem lið, sýna anda og rétt viðhorf. Mér fannst það takast upp," sagði Sverrir eftir leik.
„Þeir náðu inn tveimur mörkum á stuttum tíma. Það drap leikinn svolítið, en munurinn á því frá laugardeginum er sá að við hengdum ekki haus."
„Við vorum að leita eftir þriðja markinu til að opna leikinn en því miður náðum við því ekki. Þeir náðu inn marki í restina sem drepur leikinn algjörlega."
Belgía er í öðru sæti á heimslistanum, bronsliðið frá HM í sumar.
„Belgía er lið í heimsklassa, eru með leikmenn í bestu félagsliðum í heimi. Við vitum að það þarf allt að ganga upp til að vinna svona lið. Við eigum inni sterka pósta og lykilmenn, en það eru fullt af leikmönnum sem koma inn í dag og gera vel."
„Það er nýr þjálfari hjá okkur og þetta mun taka tíma, við þurfum að vera þolinmóðir. Vonandi getum við nýtt þessa leiki fram að undankeppni til að ná inn reynslu og vera sem best undirbúnir."
Lukaku fiskaði vítaspyrnu og skoraði tvö
Sverrir lenti í basli með Romelu Lukaku, framherja Manchester United, í kvöld. Fyrsta mark Belga kom úr vítaspyrnu eftir að Sverrir hafði brotið á Lukaku.
„Það er mjög erfitt að eiga við Lukaku á stóru svæði, einn á einn. Hann er nautsterkur. Ég veit ekki hvort þetta var vítaspyrna," sagði Sverrir að lokum.
Lukaku var frábær í leiknum en auk þess að fiska vítaspyrnuna þá skoraði hann tvö mörk.
Viðtalið við Sverri er í heild sinni hér að ofan.
Athugasemdir