Spá Fótbolta.net fyrir Bestu deildina: 4. sæti

Spáin:
1. ?
2. ?
3. ?
4. KR, 104 stig
5. Stjarnan, 102 stig
6. ÍA, 84 stig
7. FH, 62 stig
8. KA, 60 stig
9. Fram, 58 stig
10. Afturelding, 37 stig
11. Vestri, 27 stig
12. ÍBV, 14 stig

Um liðið: Það eru breyttir tímar í Vesturbænum og mikil jákvæðni í gangi. Það er loksins eitthvað að gerast í aðstöðumálum og stærst er það að Óskar Hrafn Þorvaldsson er kominn heim og byrjaður að byggja upp spennandi lið. Síðasta sumar byrjaði vel fyrir KR og þeir unnu fyrstu leiki sína en svo fór allur taktur úr liðinu einhvern veginn og þeir voru í fallbaráttu lengi vel. Þjálfarinn var látinn fara og Óskar Hrafn tók að lokum við eftir að hafa gegnt nánast öllum störfum hjá félaginu áður en hann tók við sem þjálfari. Núna eru afar spennandi tímar framundan í Vesturbænum og jákvæðni fyrir því að liðið geti komist aftur á toppinn í íslenskum fótbolta.

Þjálfarinn: Eins og segir hér að ofan, þá er Óskar Hrafn tekinn við KR. Hann þekkir félagið inn og út, er uppalinn í Vesturbænum. Hann þjálfaði yngri flokka félagsins fyrir nokkrum árum og tók svo við sem aðalþjálfari Gróttu þar sem hann gerði ótrúlega hluti. Hann kom Gróttu alla leið upp í Bestu deildina og stýrði Breiðabliki svo til Íslandsmeistaratitils ásamt því að koma þeim í riðlakeppni Sambandsdeildarinnar. Hann stoppaði stutt sem þjálfari Haugesund í Noregi og kom aftur heim. Óskar tók fyrst við sem yfirmaður fótboltamála hjá KR og er núna einnig þjálfari liðsins; hann er maðurinn með lyklana í Vesturbænum og fyrir KR er það afar spennandi.

Styrkleikar: KR er með einn besta þjálfara deildarinnar, ef ekki bara þann besta. Hann er með reynslu af því að byggja upp lið og hefur honum vegnað vel í því í gegnum tíðina. Óskar hefur fengið marga uppalda leikmenn til baka og er komið meira KR-hjarta í þetta lið sem er svo sannarlega styrkleiki. Þegar KR fann taktinn í fyrra eftir að Óskar tók við, þá voru þeir illviðráðanlegir sóknarlega. Framarlega á vellinum eru þeir með einn besta leikmann deildarinnar í Aron Sigurðarson og á hinum kantinum geta þeir boðið upp á einn fljótasta leikmann deildarinnar í Luke Rae. Þetta eru sterk vopn. Lið KR hefur leikið vel á undirbúningstímabilinu og getur tekur það með sér inn í mótið. Í KR er rík saga og frábær stuðningsmannakjarni sem getur hjálpað liðinu mikið að komast aftur á þann stað sem félagið á að vera á.

Veikleikar: Í markinu er reynslulítill markvörður og það vantar kannski leiðtoga fyrir framan hann í varnarlínuna sem er með reynslu. Það hafa orðið miklar breytingar á milli ára og Óskar hefur fengið tæki og tól til að smíða sitt eigið lið, en það gæti tekið tíma fyrir liðið að stilla saman strengi og aðlaga sig að hvor öðrum. Það fóru rosa mikið af mörkum með Benoný Breka og á Eiður Gauti líklega hvað mest að fylla í hans skarð. Eiður hefur raðað inn mörkum í neðri deildunum en á enn eftir að sýna að hann geti gert það í Bestu deildinni, að hann geti skorað meira en tíu mörk. Það er svolítið óskrifað blað.

Lykilmenn: Finnur Tómas Pálmason og Aron Sigurðarson
Finnur Tómas hefur alla hæfileika til að vera einn besti varnarmaðurinn í deildinni. Hann sýndi það svo sannarlega ekki á síðasta tímabili en hann verður að stíga upp á þessu tímabili. Hann er með nýliða í deildinni við hlið sér og þarf vera til staðar fyrir hann. Finnur kom eins og stormsveipur inn í deildina á sínum tíma og þarf að finna það form aftur. Aron er þá einn besti leikmaður deildarinnar. Hann getur unnið leiki upp á sitt einsdæmi og er langbesti- og mikilvægasti leikmaður KR.

Gaman að fylgjast með: Eiður Gauti Sæbjörnsson
Það verður mjög gaman að fylgjast með Halldóri og Júlíusi sem komu úr Fjölni en það verður sérlega skemmtilegt að fylgjast með Eiði Gauti. Strákur sem var lengi að leika sér í neðri deildunum með Ými - og raðaði þar inn mörkum - áður en hann tók skrefið upp í HK í fyrra. Núna er hann kominn á mun stærra svið í KR og það verður einstaklega gaman að fylgjast með því hversu mörg mörk hann mun skora í sumar. Svo er Alexander Rafn Pálmason fæddur árið 2010 og hefur verið að fá mínútur. Mikið efni þar á ferðinni, mjög mikið.

Spurningamerkin: Hvernig verður fyrsta heila tímabilið hjá Óskari? Hvernig koma allir nýju mennirnir inn í þetta? Hvernig verður gervigrasið á Meistaravöllum?

Völlurinn: Það eru stórar breytingar á Meistaravöllum því verið er að leggja gervigras á aðalvöllinn. Þetta er stór breyting fyrir eins sögufrægan völl en þetta er líklega nauðsynleg breyting fyrir fótboltann sem Óskar vill spila og fyrir alla iðkendur félagsins. Meistaravellir lykta af ríkri sögu og þarna er gaman að horfa á fótbolta.

Komnir:
Júlíus Mar Júlíusson frá Fjölni
Halldór Snær Georgsson frá Fjölni
Alexander Helgi Sigurðarson frá Breiðabliki
Eiður Gauti Sæbjörnsson frá HK
Atli Hrafn Andrason frá HK
Vicente Valor frá ÍBV
Róbert Elís Hlynsson frá ÍR
Hjalti Sigurðsson frá Leikni
Matthias Præst frá Fylki
Kristófer Orri Pétursson frá Gróttu
Gabríel Hrannar Eyjólfsson frá Gróttu
Óliver Dagur Thorlacius frá Fjölni

Farnir:
Benoný Breki Andrésson til Stockport
Theodór Elmar Bjarnason hættur og orðinn aðstoðarþjálfari
Alex Þór Hauksson til Stjörnunnar
Axel Óskar Andrésson í Aftureldingu
Guy Smit í Vestra
Jón Arnar Sigurðsson í Leikni (á láni)
Jakob Gunnar Sigurðsson til Þróttar R. (á láni, keyptur frá Völsungi síðasta sumar)
Óðinn Bjarkason í ÍR (á láni)
Lúkas Magni Magnason
Eyþór Aron Wöhler í Fylki
Hrafn Guðmundsson til Stjörnunnar
Rúrik Gunnarsson til HK
Viktor Orri Guðmundsson í Gróttu
Dagur Bjarkason í Gróttu
Björgvin Brimi Andrésson í Gróttu



Leikmannalisti:
1. Sigurpáll Sören Ingólfsson (m)
3. Júlíus Mar Júlíusson
4. Jóhannes Kristinn Bjarnason
5. Birgir Steinn Styrmisson
6. Alexander Helgi Sigurðarson
7. Finnur Tómas Pálmason
8. Stefán Árni Geirsson
9. Eiður Gauti Sæbjörnsson
10. Guðmundur Andri Tryggvason
11. Aron Sigurðarson (f)
12. Halldór Snær Georgsson (m)
14. Alexander Rafn Pálmason
15. Gyrðir Hrafn Guðbrandsson
16. Matthias Præst Nielsen
17. Luke Conrad Morgan Rae
18. Óliver Dagur Thorlacius
19. Vicente Rafael Valor Martinez
20. Atli Hrafn Andrason
21. Gabríel Hrannar Eyjólfsson
22. Ástbjörn Þórðarson
23. Atli Sigurjónsson
24. Kristófer Orri Pétursson
26. Hrafn Tómasson
27. Róbert Elís Hlynsson
28. Hjalti Sigurðsson
29. Aron Þórður Albertsson
30. Sigurður Breki Kárason

Fyrstu fimm leikir KR:
6. apríl, KA - KR (Greifavöllurinn)
14. apríl, KR - Valur (AVIS völlurinn)
23. apríl, FH - KR (Kaplakrikavöllur)
27. apríl, KR - ÍA (Meistaravellir)
5. maí, Breiðablik - KR (Kópavogsvöllur)

Spámennirnir: Anton Freyr Jónsson, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Kári Snorrason, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Sölvi Haraldsson, Tómas Þór Þórðarson og Valur Gunnarsson.