Spá Fótbolta.net fyrir Bestu deildina: 6. sæti

Spáin:
1. ?
2. ?
3. ?
4. ?
5. ?
6. ÍA, 84 stig
7. FH, 62 stig
8. KA, 60 stig
9. Fram, 58 stig
10. Afturelding, 37 stig
11. Vestri, 27 stig
12. ÍBV, 14 stig

Um liðið: Eins og FH, sem er spáð sjöunda sæti, þá er ÍA svo sannarlega stórveldi í íslenskum fótbolta. Það er ekki langt síðan það voru gerðir þættir á RÚV um stórveldið sem ÍA er. Það er rík saga upp á Akranesi og þar eru miklar kröfur á árangur. Skagamenn hafa hins vegar verið alltof mikið jójó lið síðustu árin. Þeir hafa flakkað mikið á milli deilda og ekki verið að gera neina spes hluti ef talað er hreint út. Í fyrra komu þeir aftur á móti upp sem nýliðar og gerðu mjög flotta hluti. Þeir komu á óvart. Fólk var að spá þeim í neðri hlutanum fyrir mót en þeir voru allt sumarið að berjast í efri hlutanum og komust í efri hlutann við skiptingu. Að lokum voru þeir ekki langt frá Evrópusæti; dómaraskandall myndu örugglega margir á Akranesi segja. Núna er góður grunnur til að byggja á og taka þetta enn lengra.

Þjálfarinn: Jón Þór Hauksson er á leið inn í sitt fjórða tímabil sem aðalþjálfari Skagamanna. ÍA féll úr Bestu deildinni á hans fyrsta tímabili en hann fékk traustið áfram og kom liðinu beint upp aftur. Jón Þór er fyrrum þjálfari Vestra og íslenska kvennalandsliðsins en hann hafði þjálfað hjá ÍA í mörg ár áður en hann tók loksins við sem aðalþjálfari og þekkir hann Skagann býsna vel. Jón Þór er harður í horn að taka en hann virðist vera hárrétti maðurinn til að stýra þeirri vegferð sem er í gangi á Akranesi.

Styrkleikar: Skagamenn hafa byggt upp vel skipulagt lið síðustu árin þar sem allir vita sín hlutverk upp á tíu. Þeir voru virkilega sterkir í uppstilltum varnarleik á síðasta ári og voru með þriðja besta varnarlið deildarinnar á eftir Víkingi og Breiðabliki þegar 22 leikir voru búnir. Það voru allir að ganga í sama takt í fyrra og Jón Þór náði því besta út úr flestöllum leikmönnum liðsins. Bak við tjöldin eru menn líka að gera allt rétt og það er virkilega vel haldið utan um liðið.

Veikleikar: Breiddin er ekki sú almesta. Skagamenn hafa lánað marga sem eiga að taka næstu skref í stærri hlutverkum annars staðar. Það eru ungir strákar næstir inn og spurning hvort þeir séu tilbúnir þegar þeir fá kallið. Þeir mega ekki við meiðslum lykilmanna en ef nokkrir detta út, þá gæti þetta verið fljótt að detta niður hjá liðinu. Hinrik Harðarson og Viktor Jónsson náðu sérlega vel saman á síðasta tímabili, en Hinrik er farinn erlendis núna og Viktor þarf að mynda tengingu með öðrum leikmönnum. Það gæti tekið sinn tíma. Pressan á Skaganum er mikil og það er talað um fátt annað en fótbolta í bænum. Fyrir unga leikmenn gæti það verið erfitt og ef tímabilið byrjar illa, þá gæti það farið í hausinn á mönnum. Við höfum séð það gerast áður að ÍA komi upp, geri vel á fyrsta tímabili og svo fari allt í vaskinn á öðru tímabili.

Lykilmenn: Erik Tobias Sandberg og Rúnar Már Sigurjónsson
Erik Tobias kom fyrir síðasta tímabil og lék frábærlega í hjarta varnarinnar hjá ÍA. Hann límdi vörnina saman og var einn besti miðvörður deildarinnar. Það var ekkert ótrúlega mikið talað um hann en þeir Skagamenn sem fylgjast vel með, þeir vita hversu góður og mikilvægur hann er fyrir þetta lið. Það var mikill happafengur fyrir ÍA að framlengja við hann. Rúnar Már Sigurjónsson var mikið meiddur á síðustu leiktíð en hann hefur litið vel út að undanförnu og er kominn með fyrirliðabandið hjá Skagamönnum. Það er eins og ÍA sé að fá nýjan leikmann ef hann helst heill. Á að vera einn besti leikmaður deildarinnar. Hér er einn vert að nefna Viktor Jónsson sem á að sjá um markaskorunina.

Gaman að fylgjast með: Haukur Andri Haraldsson
Það eru einhver ótrúleg fótboltagen í þessari fjölskyldu. Haukur Andri er yngstur af bræðrunum og er gríðarlega spennandi leikmaður sem minnir mjög mikið á Hákon Arnar inn á vellinum. Hann fór með bróður sínum til Lille og var þar í unglingakademíunni, en lífið þar var erfitt og er hann kominn aftur núna upp á Skaga þar sem hann mun spila stórt hlutverk í sumar. Var frábær í leik með U21 landsliðinu á dögunum og það verður ótrúlega gaman að fylgjast með þessum duglega miðjumanni í sumar. Einn mest spennandi leikmaður Bestu deildarinnar.

Spurningamerkin: Haldast réttu mennirnir heilir? Springur Haukur Andri út? Verður Rúnar Már einn besti leikmaður deildarinnar?

Völlurinn: ELKEM völlurinn á Akranesi er einn af tveimur völlum deildarinnar sem er með náttúrulegt gras. Það er ótrúleg saga þarna og ákveðið hitamál í bænum hvort eigi að setja gervigras á völlinn eða ekki. Þarna hafa unnist Íslandsmeistaratitlar og stemningin getur verið mögnuð ef það gengur vel.

Komnir:
Gísli Laxdal Unnarsson frá Val
Baldvin Þór Berndsen frá Fjölni
Ómar Björn Stefánsson frá Fylki
Jón Sölvi Símonarson frá Breiðabliki (á láni)
Haukur Andri Haraldsson keyptur frá Lille (var á láni)

Farnir:
Hinrik Harðarson til Odd
Arnór Smárason hættur
Jón Breki Guðmundsson til Empoli
Ingi Þór Sigurðsson í Grindavík á láni
Hilmar Elís Hilmarsson til Fjölnis á láni
Arnleifur Hjörleifsson til Njarðvíkur á láni
Árni Salvar Heimisson í Grindavík á láni
Breki Þór Hermannsson í Grindavík á láni
Dino Hodzic orðinn markmannsþjálfari
Marvin Darri Steinarsson til Gróttu (var á láni frá Vestra)

Leikmannalisti:
1. Árni Marínó Einarsson
3. Johannes Bjorn Vall
4. Hlynur Sævar Jónsson
5. Baldvin Þór Berndsen
6. Oliver Stefánsson
7. Haukur Andri Haraldsson
8. Albert Hafsteinsson
9. Viktor Jónsson
10. Steinar Þorsteinsson
12. Jón Sölvi Símonarson
13. Erik Tobias Sandberg
14. Hektor Bergmann Garðarsson
15. Gabríel Snær Gunnarsson
16. Rúnar Már Sigurjónsson
17. Gísli Laxdal Unnarsson
18. Guðfinnur Þór Leósson
19. Marko Vardic
20. Ísak Máni Guðjónsson
22. Ómar Björn Stefánsson
26. Matthías Daði Gunnarsson
28. Birkir Hrafn Samúelsson
33. Arnór Valur Ágústsson
66. Jón Gísli Eyland Gíslason

Fyrstu fimm leikir ÍA:
6. apríl, Fram - ÍA (Lambhagavöllurinn)
14. apríl, Stjarnan - ÍA (Samsungvöllurinn)
23. apríl, ÍA - Vestri (ELKEM völlurinn)
27. apríl, KR - ÍA (Meistaravellir)
4. maí, ÍA - KA (ELKEM völlurinn)

Spámennirnir: Anton Freyr Jónsson, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Kári Snorrason, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Sölvi Haraldsson, Tómas Þór Þórðarson og Valur Gunnarsson.