Það var létt yfir Davíð Snorra Jónassyni, þjálfara íslenska U-21 árs landsliðsins eftir mikilvægan sigur á Hvíta-Rússlandi í undankeppni fyrir Evrópumót U-21 árs landsliða.
"Þetta var sætur sigur klárlega, byrjuðum frábærlega og hápressan skemmtileg hjá okkur svo getur verið eitt það erfiðasta sem maður gerir í fótbolta það er að reyna finna jafnvægi milli þess að pressa og ekki pressa og það tók okkur smá tíma að átta sig á því. Hvít-Rússarnir eru líka bara með flott lið en svo í seinni náðum við að loka á þá og þetta moment var alltaf að fara koma, þetta 3-1 mark og ég er bara rosalega stoltur af strákunum, við erum búnir að klára tvö skref af þremur" Sagði Davíð Snorri í viðtali við Fótbolta.net eftir leik.
Lestu um leikinn: Ísland U21 3 - 1 Hvíta Rússland U21
Íslenska liðið gerði vel í fyrri hálfleik að pressa Hvít-Rússana en svo í seinni hálfleik skipti Davíð Snorri um leikkerfi og leyfi Hvít-Rússunum að sækja aðeins.
"Þeir voru meira með boltann en við erum búnir að vera fínir í að liggja, við skiptum í 3-5-2 og höfum verið flottir í því kerfi og það var gott að eiga það uppi í erminni í dag. Við vorum að spila við gott lið og gott að sýna andlegan styrk, að þurfa breyta í miðjum leik, að takast á við það og bara elska það að verjast"
Það hlýtur að hafa verið gríðarlegur léttir að klára leikinn í lokin þegar að Viktor Örlygur skoraði þriðja mark Íslendinga.
"Já klárlega léttir og við vissum við myndum alltaf fá sénsa, ef þú leggur svona mikið á þig þá endaru alltaf á því að fá einhver verðlaun, við erum í þessu til að spila góðan varnarleik, skora mörk. Sénsinn kom og þetta var virkilega vel útfært hjá strákunum"
Viðtalið má sjá í heild sinni hér fyrir ofan þar sem Davíð talar t.d. um meiðslin hjá Ísaki Snæ og Brynjólfi Willumssyni sem og lokaleikinn gegn Kýpur á laugardaginn.
